Amerikamiut præsidentiat, Donald Trump ivertinneqarnermi kingornali kalaallinut ataqqinnittumik pissusilersuuteqanngilaq.

Naalakkersuisuugallartut siulittaasuat, Múte B. Egede DR-imit apersorneqarnermini oqarpoq.

Taassuma nunarput kalaallit pigigaat Trumpimut erseqqissaatigeqqinniarlugu naqqissuserpaa.

- Nunarsuarmi maannakkut pisut ernumassutigingaatsiarpakka. Nunarsuup aaqqissugaanera assigiinngitsorpassuartigut patajavoq, immaqalu USA-p præsidentiata qanorluunnit periarsinnaanera inuit toqqissisimanngissutigaat, taanna DR-imut oqarpoq.

Donald Trump Kalaallit Nunaannut dollarinik milliarderpassuarnik aningaasaliiniarluni kalaallillu pisuunngortinniarlugit ataasinngornermut unnukkut oqaatigaa. Tamanna inoqatinut attaveqaatikkut Truth Socialikkut allappaa.

Trumpip inoqatinut attaveqaatitigut allagarsiussaq kalaallit nalunaaqutaat naapertorlugu unnukkut qulinut saqqummersippaa. DR-ip Múte B. Egedemik apersuinera Trumpip allagarsiussaqannginnerani pivoq.

Naalakkersuisoqatigiit siammasissuutikkusukkai

Múte B. Egede IA qinigaanerpaaqqissappat qinersinerup kingorna naalakkersuisoqatigiit siammasissuunissaannik kissaateqarluni DR-imut oqarpoq. Taassuma oqarnera naapertorlugu naalakkersuisoqatigiit siammasissuullutillu qajannaatsuunissaat pingaaruteqarpoq.

- Uanga aalajangiisussaagaluaruma nunarput avataanit taama tatineqarfigitillugu, Danmarkimullu atanitsinni ullut allanngorartillugit naalakkersuisoqatigiit siammasissuunissaat nunatsinni pisussaaffigisariaqaripput isumaqarpunga, taanna DR-imut oqarpoq.

IA-p siulittaasuata partiit arlaat mattutereernianngilaa, pissutsilli suleqatigiiffigineqarsinnaasariaqartut erseqqissaatigaa.

Donald Trumpip nunatsinnik piserusunnini siullermik 2019-imi oqaatigaa, taassuma qeqertarujussuup amerikamiunit pigineqalernissaanut eqqarsaatini siorna decembarimi oqaatigeqqippaa.

Trumpip kissaateqarnini Washingtonimi Kongressemi sapaatip akunnerata siuliani oqalugiarnermini oqaatigeqqippaa.

Tamanna pillugu Múte B. Egede aammaarluni – uteqqiivoq.

- Kalaallit Nunaat kalaallit pigaat. Amerikarmioorusunngilagut, danskiunianngilagut kalaaliuvugummi. Tamanna amerikamiut siuttuatalu paasisariaqarpaat, Múte B. Egede Trumpip sapaatip akunnerata siuliani oqalugiarnerata kingorna Facebookikkut allappoq.

Danskit naalakkersuisui taama aamma oqariartuuteqarput. Kalaallit Nunaat Danmark Savalimmiullu peqatigalugit naalagaaffeqatigiinni ilaavoq.

Trump Inatsisartunut marlunngornermi qinersinissaq sioqqullugu ippassaq unnukkut nalunaaruteqarpoq.