Amerikami præsidentip Donald Trumpip Kalaallit Nunaata pisuunngortinnissaannut pisareeqqavoq.

USA Kalaallit Nunaat innuttaallu pisuunngortinniarlugit piareersimasoq Trumpip inoqatinut attaveqatigiittarfikkut Truth socialikkut, ataasinngornermi unnuakkut allappoq.

Aningaasat taakku Kalaallit Nunaanni suliffissanik arlalinnut aningaasaliinerussasut, præsident oqarpoq.

- Kalaallit Nunaat pisuunerulersikkusullugu milliardit dollarink aningaasaliinissatsinnut piareeqqavugut, præsident allappoq.

Taanna præsidentinngornerminiit kongressimi oqalugiarnera siulleq sapaatit akunnerata siuliani pivoq. 

- USAp Kalaallit Nunaanni innuttaasut siunissami namminneq sorusunnertik aalajangissagaat tapersersoraa, kongressimi oqalugiarninni erseqqissarpara, Trump allappoq.

Sillimaniarneq pitsanngorsarniaraa

Kalaallit Nunaanni sillimaniarneq aamma tapersersorusullugu Trumpip saqqummiussaani erserpoq.

- Ilissinnut illersuinerput nangeqqikkusupparput, soorlu sorsunnersuup aappaanin taamaaliortugut, præsident allappoq.

Sorsunnersuup aappaata nalaanili USA Kalaallit Nunaanni sakkutooqarfeqalerpoq, danskit illersornissamut sulisuit aamma Kalaallit Nunaannit suliaqartut.

Donald Trumpip Kalaallit Nunaat pisiariniarlugu 2019-imi siullermik oqariartoqqaarnikuuvoq, siornalu decembarimi aamma taamatut oqariartuuteqaqqilluni, tassa Kalaallit Nunaat amerikamit pigineqalissasoq. Taamanili oqaaseq taanna maannamut utikattuarpaa.

Tamanna issittumi sillimaniarneq pissaaneqarfigerusunneranik, pingaartumillu Rusland taamatut inissisimanerani aallaaveqarpoq.

Kingorna Kalaallit Nunaat pillugu oqaatsini sakkortuseriaannarpai, pisariaqassappat Kalaallit Nunaat sakkutuulersornikkut aqunneqalersinnaanerarlugu.