Nunatsinni naalakkersuisut siulittaasorigallagaat, Múte B. Egede (IA) amerikamiut præsidentiata, Donald Trumpip oqaaserisai kingulliit pissutigalugit atorfillit kalaallit partiivisa siulittaasuannik aggersaaqquai.

Taassuma tamanna Facebookikkut ippassaq unnukkut allappaa.

Trumpip nunarput amerikamiunit tiguarneqassasoq ilimagalugu ippassaq oqaatigaa.

Tamannali Múte B. Egedep "akuerinianngilaa".

- Isiginngitsuusaarneqarsinnaanngimmat qinersinerup inernera ataqqigaluarlugu Naalakkersuisut Siulittaasuugallartutut pisussaaffittut isigigakku, partiit siuttuisa piaarnerpaamik naapinnissaat maanna suliakkiutigeqqammerpara, taanna allappoq.

- Kalaallit pinnguaanngilagut ataqqinninngilluinnartumillu Trumpip pissusilersornera, siusinnerusukkut ataatsimoorluta iliuuserisimasatsinnit sakkortunerujussuarmik killilertariaqalerpoq, tassa naammaqaaq.

Múte B. Egedep allagaani qaqugu ataatsimiittoqassanersoq– itigartitsinerlu qanoq sakkortunerulersinneqassanersoq allassimanngilaq.

Amerikamiut præsidentiata oqaaseq tiguaaneq, nammineq naalagaaffigisamut ilanngutititsinermik isumaqartoq nammineerluni atunngilaa.

Kisianni "tiguaasoqarsinnaaneranut" eqqarsaateqarnersoq aperineqarpoq.

- Taamaattoqarnissaa ilimagaara, Trump oqarpoq.

Qinersinermi ajugaasup, Jens-Frederik Nielsenip tamanna aamma kamaatigaa. Demokraatit naalakkersuisoqatigiinnik pilersitsinissamut Inatsisartuni partiit assigiinngitsut maanna ataatsimeeqatigillattaaleruttorpaat. Taassumalu Trump aamma itigartitsippaa:

- Trump oqariartuutaa akuersaarneqarsinnaanngilaq, takutiinnarpaalu pissutsit taamaatsillugit ataatsimoortariaqartugut, taanna Facebookikkut allappoq.