Trumpimut akerliussutsimik takutitsineq: Naammaqaaq

Eqqissisimasumik akerliussutsimik takutitsineq aqagu arfininngorneq nalunaaqutaq ataatsimut pissaaq, tamannalu erseqqissumik oqariartuuteqarfiulluni: Naammaqaaq.

Akerliussutsimik takutitsisut Amisuniit amerikamiut konsuuleqarfianut oqariartuuteqarlutik ingerlaaqatigiissapput, Orla Joelsen pisussamik pilersaarusiortuusoq Facebookikkut allappoq.

- Amisuniit USA-p aallartitaqarfianut ingerlaaqatigiikkumaarpugut, apuukkuttalu inuiattut erinarsuuterput atussavarput. Tulluarsoritikkatsigu taamatut inuiattut ataatsimoornissatsinni aamma pisariaqarfiata nalaaniimmat inuiattut erinarsuutitta atornissaa, Orla Joelsen oqarpoq.

Kalaallit ataatsimoorlutik amerikamiut præsidentiata Trumpip oqaaserisaanut aarlerinartunut akiuunnertik takutinniarlugu nunatta erfalasuanik tigummiarlutik akerliussutsimik takutitsissapput, Donald Trumpimi nunarput tiguarusullugu ippassaq oqaaseqaqqippoq.

- Uanga nammineq neriuutigivara Trumpip aammali amerikamiut paasissagaat Kalaallit Nunaat tiguneqarsinnaanngimmat, aammalu demokratiskimik ingerlagatta taanna oqariartuut neriuppunga amerikamiunut pingaartumillu Trumpimut apuunneqarumaartoq.

Taannalu Nuummi sinerissallu sinnerani akerliussutsimik takutitsinermut sapinngisamik amerlasuunik peqataaqqusivoq.

- Kaammattuutigissavara amerlasuut sinerissami peqataassasut, amerlanerulluta peqataagutta aamma oqariartuuterput siammasinnerusumik apuunniassammat.

Amerikamiut præsidentiata Donald Trumpip oqaaserisai kingulliit pissutigalugit nunatsinni naalakkersuisut siulittaasorigallagaat, Múte Bourup Egede kalaallit partiivisa siulittaasuannik ataatsimiinnissamut tuaviortumik aggersaavoq.