Demokraatit siulittaasuata, Jens-Frederik Nielsenip ataatsimiititsinerani matuni matoqqasuni ataatsimiittoqaleruttorpoq. Taassuma naalakkersuisuni siammasissumik suleqatigiinnissaq anguniarlugu, Facebookikkut allappaa.

- Naalakkersuisooqatigiit siammasinnerpaamik inissinnissaat Demokraatiniit kissaatigaarput. Politikkikkut isumaqatigiinngiffiit pinnagit toqqissisimaneq ujartorneqassooq. Nunatsinni inissisimaffipput imaannaangitsumiittoq piffissaq isumaqatigiinngiffinnut atussallugu tulluanngilaq, taanna allappoq.

Amerikamiut præsidentiat, Trump nunatsinnik aqutsilerniarluni – aammaarluni – ippassaq oqaaseqareersorlu Jens-Frederik Nielsen taama nalunaaruteqarpoq. Amerikamiut præsidentiat "naalagaaffimminut ilanngutitsisinnaanermut" tunngatillugu tusagassiortunik katersortitsinermi aperineqarami, ima akissuteqarpoq:

- Taamaattoqarnissaa ilimagaara.

Nunamik tiguaaneq nammineq naalagaaffimminut ilanngutititsinermik isumaqarpoq.

Siorasaarneqarutta ataatsimoorluta sulissaagut

Jens-Frederik Nielsenip Trumpip oqaaserisai ”akuersaarneqarsinnaannginnerarpai”.

Partiit siuttui Trumpimut itigartitsinerup sakkortunerujussuanngortinneqarnissaa pissutigalugu ullumi ataatsimiipput. ”Kalaallimmi pinnguaanngitsugut ataqqinninngilluinnartumillu pissusilersorfigineqassanngitsugut, tamannalu naammalersoq” Múte B. Egede (IA) Facebookikkut allappoq.

Jens-Frederik Nielsenilu naalakkersuisuni amerlanerussuteqalaaginnartoqarani siammasissumik suleqatigiinnissamik anguniagaqarpasippoq.

- Isumaqatiginninniarnerit manna siullermeerlugit allarnersimalerpagut, maannakkullu allarniutaasimasumiit sulinerput ingerlateqqissavarput. Pissutsit taamaannerini naaperiaasinnaaneq atussavarput.

- Naalakkersuinikkut ataatsimoornerput nunarsuup sinneranut maanna takutittariaqalerparput. Nunarput innuttaasuilu salliullugit sulinerput ingerlatissavarput, Jens-Frederik Nielsen oqarpoq.

- Arlaat siorasaarniarunitigut, nikassarniarunitigut imaluunniit pitsaanngitsumik oqaluunniarunitigut ataatsimoorluta sulinerput ingerlatissavarput. Nunarput innuttaasullu partiilersornermiit pingaarnerussapput.

Partiit tamarmik sapaatip akunnerata tulliani ataatsimiinnissamut aggersarneqaqqipput.