Amerikamiut senatorii sisamat Nuummiittut: Kalaallit Nunaat ikinngutigaarput. Ikinngutigiinneq tatiginninnermik tunngaveqarpoq
Amerikamiut aallartitat senatorinik sisamanik ilaqartut Kalaallit Nunaannut tapersersuinerminnik takutitsiartorlutik politikerinillu ataatsimeeqateqariartorlutik Nuummut sapaatip akunnerata naanerani tikipput.
Taakku Naalakkersuisut siulittaasuat, Jens-Frederik Nielsen ataasinngornermi ullaakkut ataatsimeeqatigereerlugu Hotel Hans Egedemi tusagassiortunut katersortitsipput, tassanilu Nuummi sapaatip akunnerata naanerani susimanerlutik oqaluttuaraat – taakkulu kalaallinut innuttaasunut ersarissumik oqariartuuteqarput.
Mainemit senatori attaviitsoq, Angus King eqimattat tikeraarneranni aqutsisuuvoq, taassuma Kalaallit Nunaannut aamma Natomi iligiinni suleqatigiinnermut ataqqinninnertik oqariartuutigigitsik oqaatigaa.
- Kalaallit Nunaata innaligassaannginnera, nammineq pisuussutiminik aqutsinissaa, Danmarkimik suleqateqarnera ataqqineqartut qitiusumik oqariartuutaavoq, King oqarpoq.
Aamma Kongressimi amerlanerussuteqartut innuttaasullumi akornanni Kalaallit Nunaannut tapersersuingaatsiartoqartoq, nunap avannarpasissuanit, naalagaaffimmut ilaasumit, Mainemit senatori 81-inik ukiulik oqarpoq.
Kalaallit Nunaannut soqutiginnittoqangaatsiartoq
Kingip Demokraatini ilaasortat, Gary Peters aamma Maggie Hassan Michiganimeersoq New Hampshiremeersorlu kiisalu republikanerit senatoriat Alaskameersoq, Lisa Murkowski angalaqatigai. Taakku tunuanni Amerikamiut erfalasuat takuneqarsinnaavoq, taakkulu saanni nunanit allaneersut danskillu tusagassiortut takuneqarsinnaapput.
Aallartitat USA-p præsidentiata Venezualemik ukiup aallartinnerani sakkutooqarnikkut akuliunnermi kingorna Kalaallit Nunaannik tiguaaniarluni sioorasaaruteqarlualernerata kingunerisaanik nunanit tamalaanit Kalaallit Nunaannik ukkatarinnittoqangaatsialeqqanerata nalaani tikeraarput.
Frankrig aamma Canada Nuummi sinniisoqarfinnik sapaatit akunnerisa marluk kingulliit ingerlaneranni ammaapput, taakkunanilu naalakkersuisut siulittaasuisa Kalaallit Nunaannut tamakkiisumik tapersersuinertik oqaatigereerpaat.
’Uummatikkut anniarpunga’
Senatori, Lisa Murkowski Kongressimi ilaasortat eqimattat Washingtonimi qaammatip siuliani ataatsimiittoqarnerata kingorna Danmarkimut tikeraartunut ilaavoq.
Murkowski Kingip tusagassiortunik katersortitsinermi oqaaseqarnerata kingorna oqaaseqarpoq, taassuma nunarput arlaleriarluni tikeraareerpaa. Taannali innuttaasunut misigissutsinut tunnganerusumik ullumikkut oqaaseqarpoq.
- Akerliliillaqqissunut, nukittuunut inutsialannullu nunatsinnit iligisassinniillu siooranermik annilaanganermillu misigisaqartunut – uummatikkut anniarpunga, issittumit senatori, 68-inik ukiulik oqarpoq.
- Ilaquttasilu piffissami patajaanngitsumi ersillusilu annilaangasusi tusarlugu uummatikkut annernarpoq.
Tatiginninneq pilerseqqinneqassasoq
Murkowskip King assigalugu naalakkersuisunik ataatsimeeqateqarnermik pitsaasuunerarpaa, katersortitsereerunillu Vivian Motzfeldt ataatsimeeqatigissanerarlugu.
Murkowskip USA-p, Kalaallit Nunaata Danmarkillu akornanni tatigeqatigiinneq piffissami kingullerni innarlerneqarsimasoq pilerseqqinneqassasoq oqaatigaa.
- Taamaammat Kongressimi ilaasortat maanngarlutik eqqaasinniarpaatsit, tassa aap præsidenterput assigiinngitsunik oqaaseqarpoq. Kisianni uagut Kongressitut aamma pingaarutilimmik inissisimavugut. Qanoq suliaqartarnitta kalaallinit paasineqarnissaa pingaaruteqarpoq. Tassa aningaasanik atuinermi akuersissuteqarnermilu tunngassuteqarnersoq imaluunniit paarlaasseqatigiinnerup naleqassusaanut tunnganersoq.
Tassa 'issittoq akimorlugu iligiinnermik' taasani 'tamatsinnullu iluaqutaasumik aaqqiissutissarsineq' suleqatigiinnerunerunerarpaa.
- Ataatsimut soqutigisaqarpugut, tamannalu inussiarnersumik aallartinneqarlunilu naammassineqassaaq, taanna erseqqissaaqqippoq.
Trumpip Kalaallit Nunaannut suliniutaa amerlanerussuteqartunit akerlerineqartoq
Murkowskip oqaaseqarnerata kingorna Michiganimit Gary Peters sassarpoq oqarlunilu: 'Kalaallit Nunaat ikinngutigaarput, Danmark ikinngutigaarput. Ikinngutigiinneq tatiginninnermik tunngaveqarpoq'.
Tatiginninneq taanna pilerseqqinneqarlunilu nukittorsarneqassasoq, taassuma oqaatigaa. Petersillu suleqatini assigalugu Amerikamiut amerlanerpaartaasa Kalaallit Nunaat USA-p ikinngutigigaa taamali pissuseqarfigineqassasoq isumaqartut erseqqissaatigaa.
Apeqquteqartoqarnerani King suleqatigiissitamut aamma qanoq ilisimasaqarfigineraa pillugu aperineqarpoq. Taannalu ilisimasaqarpallaanngilaq. Siusippoq, ataasiarluni marloriarluniluunniit aatsaat ataatsimiittoqartoq, taassuma oqaatigaa.
Kisianni:
- Præsidentip oqaatsiminik allanngortitsinera qinersisartutta nunallu imminermi politikkiani pissutsinik ersersitsivoq, tassa Trumpip suliniutaanut tapersersuisoqarpallaanngitsoq, taanna oqarpoq.
Murkowskip tamanna aamma taperserpaa. Taassuma Kalaallit Nunaanni politikerit siuttuinik ataatsimeeqateqarnermini ataatsimeeqatini isumaqatiginninniarnermut ilaatinneqarnermik oqariartuuteqarnerarpai.
Trumpip allannguinnginnissaa qanoq qulakkeersinnaaneraat aperineqaramik Kingip USA-p inatsisiliortuini ilaasortat qulakkeerinnillutik oqaaseqarsinnaannginnerarpai.
Kisianni ilungersunartutut pisoq qaangerpasikkipput isumaqatiginninniarnerillu uku kinguneqarluartussatut isigaagut, taanna oqarpoq.
Trumpip parteeqatai tunuani akerliliisut
Republikanerit Trumpip Kalaallit Nunaannik tiguaarusunneranut akerliunerminnik tamanut ammasunik oqaaseqarsimanersut sooq taama ikitsiginersut, aamma taakku taannatulli Kalaallit Nunaannut sooq tikeraarsimannginnersut, KNR-ip Murkowski apeqquteqarfigaa.
Murkowskip senatorit Kongressimilu ilaasortat arlallit issittup akimorlugu iligiinnerup USA-mut pingaaruteqassusaanik paasinnissinnaaniassammata Kalaallit Nunaannut tikeraarnissaannik kaammattuuteqarfiginiarlugit oqaatigaa.
Republikanerinillu amerlanerusunik taannatulli ersarissumik akerliliinnginnerannut apeqqummut tunngatillugu Alaskamit senatori ima akissuteqarpoq:
- Partiinni ilaasortat ilaat præsidentip Trumpip kissaataanut akerliliisumik iliuuseqarlutik takutikkusunngillat, taanna oqarpoq.
- Kisianni parteeqaterpassuarnik oqaloqateqareerlunga taakkulu Kalaallit Nunaannik tiguaanissamut, piginnittuunissamut, nakkutilliinissamut tigusinissamullu akuersaannginnerminnik oqaaseqarput. Kalaallit Nunaat ikinngutigaarput, iligisaavoq, Natomi iligiinniippugut.
