Tusarfiit: Ursula von der Leyenip nunatsinnukarnissani pilersaarusioraa

EU-p ataatsimiititaliarsuata siulittaasua, Ursula von der Leyen, Kalaallit Nunaannut tikeraarnissaminik pilersaaruteqarpoq.

Tusarfiup suliamik ilisimasallip kinaassutsiminik isertuussisup tamanna oqaatigigaa, tusagassiivik Bloomberg pingasunngornermi unnukkut allappoq.

Tusagassiivik naapertorlugu tikeraarneq marsimi pissaaq. Tikeraarnissamut tunngatillugu paasissutissat sukumiinerusut, soorlu ullui, suli aalajangersarneqanngitsut, tusagassiivimmit oqaatigineqarpoq.

Von der Leyenip Kalaallit Nunaannut tapiissuteqarnissaq tikeraarnermini saqqummiutissagaa, Bloombergip tusarfiisa oqaatigaat.

Atorfillit allat tikeraaqataanissaat tusarfiit aamma oqaatigaat, taakkuali kikkuuneri oqaatigineqanngilaq.

Tikeraarnissaanik nalunaaruteqarneq pisortatigoortumik uppernarsarneqanngilaq.

EU-p ataatsimiititaliarsua sinnerlugu oqaaseqartartup Bloombergimut tamanna oqaaseqarfigiumanngilaa.

Nalunaaruteqarneq uppernarsarneqarsinnaanngitsoq, nutaarsiassaqartitsivik Reuters allappoq.

Kalaallit Nunaat nunanit tamalaanit ukiup aallartinnerani eqqumaffigineqarlualerpoq. Amerikamiut præsidentiata, Donald Trumpip, qeqertamik piginnittunngorusunnini arlaleriarluni taamani oqaatigeqattaarpaa. 

EU-p allaffia atoqqaartinneqartoq

Danmarkip qeqertaq Ruslandip Kinallu soqutigisaannut illersorsinnaaneraa, Trumpip aamma qularnarsisippaa.

Trumpip Natollu qullersaata Mark Ruttep Natop Issittumi isumannaallisaanerulernissaa, Schweizimi Davosimi nunarsuaq tamakkerlugu aningaasaqarnermut januaarimi ataatsimeersuarnermi isumaqatigiissutigaat.

Ursula von der Leyen EU-p inatsisartuini januaarimi oqalugiarnermini oqarpoq, EU Issittumi isumannaallisaanerup nukittorsarnissaa pillugu suliniuteqartoq.

Siullertut, Europamiut Kalaallit Nunaanni aningaasarsiornikkut attaveqaqatigiinnermillu tapersersuiniarlutik aningaasaliinerusalernissaat pisariaqartinneqarpoq.

Aappaattut, EU-p Issittumi isumannaallisaanerup nukittorsarneqarnissaa pillugu USA suleqatigisartakkallu allat tamaasa suleqatigiumaarpai, von der Leyen oqarpoq.

Taanna Kalaallit Nunaannut siornatigut tikeraarnikuuvoq. EU-p nunatsinni illoqarfiit pingaarnersaanni, Nuummi, allaffia marsi 2024-mi atoqqaartippaa.

Kunngi Frederik Kalaallit Nunaannut ulluni makkunani tikeraarpoq, pilersaarutillu naapertorlugit tallimanngorpat angerlassalluni.

/ritzau/