- Soorunami taarsiivigineqarnissaat uagut kissaatigisimavarput aallaqqaammulli.

1992-ip kingorna nunatta peqqinnissaqarfik akisussaaffigilereernerata kingorna arnat akuersiseqqaarnagit naartunaveersaaserneqarsimasut taarsiivigineqarnissai pillugu, Pele Broberg taama oqarpoq.

Arnat 15-it pineqartut 300.000 koruuninik taarsiivigineqarnissaat, Erik Jensenip (S) novembarip naalernerani oqaatigiaarpaa.

Ullualunnguillu kingorna Naaja Nathanielsenip oqaatigaa naartunaveersaasersuisoqarsimaneranut misissuinerup septembarimi naammassippat, arnat qassiunersut taarsiissutissallu qanoq annertutigissanersut aatsaat paasineqassasoq.

Naleqqamilu siulittaasup tamanna isumaqatiginngilaa.

- Annertuumik aqqusaagaqareernikut, suli pisariaqanngitsumik aqqusaagaqarteqqinnginnissaat piniarlugu maannakkut iliuuseqarnissaannut uagut tapersiiniarluta suaaruteqartugut.

Aningaasanut inatsimmi 4,5 millionit koruunit immikkoortinneqareerpata, taarsiissutiginissaasa utaqqinissai, Pele Brobergip siunertassaqartinngilaa.

Arnat qasserpiaat eqqugaasimanersut suli qulakkeerneqanngitsoq Naaja Nathanielsenip naak eqqaareeraluaraa.

Pele Brobergilli tamanna aporfissatut isiginngilaa.

- Sipaarniarfissalli amerlaqaat. Takoreerparpummi 4 milliardinik ajornartorsiutaanngitsoq mittarfinnik sananissanik nassaarnissaq.

Arnanut eqqugaasimasunut taarsiissuteqarnissaq Naalakkersuisut kinguarsarusunngikkaat, Naaja Nathanielsenip KNR-imut allakkatigut akissummini ima allappoq:

- Ilisimasallit naalakkersuisunit pilersitat qallunaat naalagaaffiannit pilersitat ilisimatusartut arlaannaanut attuumassuteqanngitsut peqatigalugit suliaat aappaagu naammassissasoq, taanna allappoq imatullu nangippoq:

- Arnat amerlanerusut eqqugaasimanersut piffissami tassani paaserusupparput. Suliap matunnginnerani tamanna pingaaruteqarpoq. Suliaq tamatsinnut oqimaappoq, annermik arnanut eqqugaasimasunut, Naaja Nathanielsen taama allappoq.