Kommune Kujallermi qinigaarlaaq kommunalbestyrelsimiikkunnaartoq

Inunnguaq Geronne (D) Kommune Kujalliup kommunalbestyrelsianiittussaajunnaarpoq. Tamanna Qinigaasinnaanermut Ataatsimiititaliap ataatsimiinnerata, taassuma qinigaasinnaanermik annaasaqarneranik aalajangiiffiusup, inerneraa.  

Allatut oqaatigalugu Inunnguaq Geronne qinigaasinnaanngilaq. 

Tamanna imigassartorsimalluni biilersimanermik eqqartuussaasimanermik peqquteqarpoq.

Inunnguaq Geronne (D) apriilip aallaqqaataani 2025-mi 62-inik taaguunneqarpoq, Kommune Kujalliullu kommunalbestyrelsiani ilaasortanngoraluarluni.

Kommunalbestyrelsip isumaginninnermut ataatsimiititaliaani  siulittaasumut tullersortiugaluarpoq taavalu aamma Pinaveersaartitsinermut, Kulturimut Sunngiffimmullu Ataatsimiititaliami ilaasortaagaluarluni.

 KNR Inunnguaq Geronne oqaaseqarnissaanik periarfissillugu saaffigaa, taannali akinngilaq.

Borgmesterili naatsumik oqaaseqarpoq:

- Ajuusaartorujussuuvugut. Massakkullu allamik oqaaseqarusunngilagut, borgmester Malene Vahl Rasmussen (D), allappoq.

Qinigaasinnaanermut Ataatsimiititaliaq katillugit sulianik aqqanilinnik suliarinnippoq, taakkunannga suliat tallimat allat qinigaasinnaanermik annaasaqarnermik inerneqarlutik,

Taakkunani marluk kommunalbestyrelsinik sinniisussatut inissisimasuugaluarput,  ataaseq ilagiit sinnissaannut qinigaagaluarluni ataaserlu nunaqarfimmi aqutsisuni sinniisaagaluarluni. 

Naalakkersuisut Qinigaasinnaanermut Ataatsimiititaliamik pilersitsisuupput, tassanilu Nunatta Eqqartuussisuuneqarfiani eqqartuussisuuneq siulittaasuuvoq taavalu kommunalbestyrelsiniit marluk Inatsisartuniillu marluk ilaasortaallutik.

Qinigaasinnaanermut ataatsimiititaliap suliassarai inuit Kalaallit Nunaanni Kommunalbestyrelsimut, Nunaqarfinni Aqutsisunut aamma ilagiit sinniisaannut qinigaasimasut qinigaasinnaanersut misilissallugit.