Tusagassiuutit: Sipaarniuteqarnikkut 66 millionit koruunit peqqinnissaqarfinnut nassaarineqassasut

Sipaarniutit sanaartornernut kommuninullu tapiissutinut eqquissapput.

Allattoq Markus Valentin

novembarip 26-at 2025 11:41

Nutserisoq Karla Heilmann

2025-mut aningaasanut inatsisissami immikkoortinneqartuniit amerlanerusunik Peqqinnissaqarfik aningaasanik erngertumik pisariaqartitsivoq.

Missingersuutimik sinnerneri pissutigalugit pisariaqartitsilerput.

Naalakkersuisut missingersuutini assigiinngitsuni sipaarniuteqarnikkut 66 millionit koruuninik ujartuisinnaanerlutik Aningaasaqarnermut Akileraartarnermullu ataatsimiititaliamut qinnuiginnipput.

Tusagassiorfik Sermitsiaq taama allappoq.

Kommuninut ataatsimut tapiissutit 12,8 millionit koruuninik, Kullorsuarmi meeqqanut inuusuttunullu sammisassaqartitsivimmik suliniummut aningaasaliissutit 9 millionit koruuninik aamma timersortarfinnik nutarterinermut tapiissutit 5,7 millionit koruuninik ikilineqarnissaat sipaarniutit annertuut ilagaat, tusagassiorfik allappoq.

Nuummi sulisunut inissialiornissamut suliniummut 21,8 millionit koruuninik ikilisinneqarput.

Naggasiullugulu peqqinnissaqarfimmi aningaasaqarnerup qanoq ingerlanneqarneranik misissuinissamut 2,5 millionit koruunit nassaarineqassapput.

NAALAKKERSUISUT ANINGAASANIK SIPAARNIUTEQARFII

Naalakkersuisut peqqinnissaqarfinnut aningaasanik nassaarniarlutik 2025-mut missingersuutini immikkoortut sipaarniarfii aajuku.

Kommuninut ataatsimoortumik tapiissutit: 12,8 millionit koruunit.
Nuna tamakkerlugu Katsorsaavik Siunnersuisarfillu: 3 millionit koruunit.
Majoriaq: 1 millionit koruunit.
Qatserisunut taarsigassarsiat: 3 millionit koruunit.
Aalisarnerup ineriartortinneqarnissaanut immikkoortitat: 1 millionit koruunit.
Aatsitassanut Aqutsisoqarfik: 250.000 koruunit.
Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu: 250.000 koruunit.
Ujarassiornermut immikkoortortaqarfik: 1,25 millionit koruunit.
Inatsisinik Atuutsitsinermut tunngasunut immikkoortortaqarfik: 250.000 koruunit.
Qaqqat sisoorfiusut: 1 millionit koruunit.
Sillimmasiinerit: 1,2 millionit koruunit.
Avatangiisinut Aningaasaateqarfik: 1 millionit koruunit.
Kullorsuarmi meeqqanut inuusuttunullu illu sammisassaqartitsivik: 9 millionit koruunit.
Illorsuit timersortarfiit iluarsartuunnissaannut: 5,738 millionit koruunit.
Nunatta Katersugaasivianut Allagaateqarfianullu toqqorsivimmut atortorissaarutit: 1,2 millionit koruunit.
KANUAPNA-mut angallatinik pissarsineq: 1,437 millionit koruunit.
Napparsimmavinni iltiliuutinut (silaannaliuutit) suliniut: 2,827 millionit koruunit.
Nuummi sulisunut inissiat: 21,852 millionit koruunit.

Allisiguk

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.