Sarfaq Ittummut isumaqatigiissut ukiunik marlunnik sivitsorneqartoq – umiarsuullu siunissaa suli qularnartoq
Naalakkersuisut Arctic Umiaq Line kiffartuussinissamut nutaamik isumaqatigiissuteqarfigalugu tusagasiuutinut nalunaarutigaat.
Sinersortaatip Sarfaq Ittup 2026-mi 2027-milu angalanissaa taamaalilluni qulakkeerneqarpoq.
Arctic Umiaq Linep pisortaanerata, Taitsianguaq Olsenip isumaqatigiissut nutaaq nuannaarutigalugu oqaatigaa.
- Arctic Umiaq Line A/S-miit Namminersorlutik Oqartussanut sullissinissamik isumaqatigiissuteqarnerput nuannaarutigaarput. Atuisutta ujartugaattut Qaqortup Ilulissallu akornanni sapaatip akunnikkaartumik angalasarluni sullissisoqartassaaq.
Umiarsuaq pisoqalisoq
Sarfaq Ittup ukiunik 34-nik pisoqaassuseqartoq KNR-imit aggustimi saqqummiunneqarpoq.
Pisortaanerup angallassisarneq piffissamut ungasinnerusumut qulakkeerneqassappat umiarsuaq taarserneqassasoq taamani oqaatigaa.
Umiarsuarmut nutaamut aningaasaliinissamut kiffartuussinissamik isumaqatigiissut sivikinnerpaamik ukiut 15-iusariaqartut Arctic Umiaq Linep KNR-imut paasissutissiissutigaa.
Sanaartornerinnaalu ukiut marluk missaanni sivisussuseqassaaq.
Aamma politikerit Nuummi Ilulissanilu mittarfiit nutaat ammarneratigut imaatigut angallassisarnermik unitsitsiniarpasittut Taitsianguaq Olsenip 2020-mi oqaatigaa.
Naalakkersuisut tusagassiuutinut ullumikkut nalunaaruteqarnerminni aamma ima allapput:
- Taamaattumik siunissaq pillugu aalajangiisoqarsinnaalinnginnerani allanngornerit taakkua ilisimanissaat paasinissaallu pisariaqartussaavoq.
Siunissaq qularnartoq
Naallu angallassisarnermut siunissap qanoq innissaa suli qularnaraluartoq attaveqaasersuutinut isorliunerusunullu naalakkersuisoq maanna nuannaarpoq.
Taassuma oqaluttuarisaanermut pingaaruteqarnera aamma pingaartuutippaa.
- Sarfaq Ittuk oqaluttuarisaanermi nunatsinnut pingaaruteqarpoq, aamma inuiaqatigiinnut kalaallinut kiisalu takornarianut ukiorpassuit ingerlanerini tikeraartorisartakkatsinnut nuannaarutaasumik.
