Sarfaq Ittuk pisoqalivoq, umiarsuartaarnissarli aningaasassaqartinneqanngilaq
Sinersortaatitoqaq Sarfaq Ittuk ullutsinnut naleqqukkunnaarpoq. Assersuutigalugu elevatoreqanngilaq, tamannalu pitsorluttunut utoqqarnullu ajornakusoortitsivoq.
Ukiunilumi 34-ni imaatigut angallatigineqareerluni pisoqalivallaarpoq, pisoqaliartorneralu ilutigalugu, aserfallatsaaliornera akisuneruleraluttuinnarpoq.
- Taamaattumik imaani sinersorsinnaanerup piffissaq ungasinnerusoq isigalugu attatiinnarnissaa soqutigineqassappat, Sarfaq Ittuk nutaamik taarsertariaqassaaq, Arctic Umiaq Linemi pisortaaneq, Taitsiannguaq Olsen, oqarpoq.
Taanna paasissutissiivoq, Arctic Umiaq Line, umiarsuassamik nutaamik titartaasitsisoqareernikuusoq. Umiarsuassalli piffissami qaninnermi piviusunngortinneqarnissaa ilimananngilaq.
Suliffeqarfiummi umiarsuassaq akissaqartinngilaa. Taamaattumik Arctic Umiaq Line politikkikkut taperserneqarnissartik pisariaqartilluinnarpaat. Tapersiinerlu kiffartuussinissamik isumaqatigiissummik siammasissuminngaanneertariaqassaaq.
- Umiarsuaq nutaaq sanatissagutsigu, minnerpaamik ukiunik 15-inik pisariaqartitsivugut, taavalu aamma aningaasalersornissaa ujartortariaqarlugu.
Kiffartuussinissamik isumaqatigiissut qaangiutilersoq
Tamannali aamma ajornartoqassaaq. Kiffartuussinissamik isumaqatigiissut Arctic Umiaq Linemut atuuttoq, ukioq manna atuukkunnaassaaq. Nutaamillu isumaqatigiissusiorniarnermut tunngatillugu, Namminersorlutik Oqartussat, kiffartuussinissamik isumaqatigiissumik ukiuni marlunni atuuttussamik siunnerfeqartutut, Taitsiannguaq Olsenip paasivai.
Paasisanilu aallaavigalugit, politikerit Arctic Umiaq Linemut tunngatillugu allamik iliuuseqarusunnerusorivai.
2020-mimi Nuummi Ilulissanilu mittarfissuartaartoqarnissaanik pilersaartoqalermat, suliffeqarfik kiffartuussinissamut isumaqatigiissummik ukiuni tallimani atuuttussamik, isumaqatigiissusiorfigineqarpoq, Air Greenland Disko Linelu ukiuni qulini atuuttussanik isumaqatigiissusiorfigineqarlutik.
Ukiumoortumik naatsorsuutini ukioq kingullerneersuni takuneqarsinnaavoq, Arctic Umiaq Line-p 2024-mi ilaasui 2023-mi ilaasuisa amerlassusaannut sanilliullugit 5000-nik ikileriarsimasut.
Tamanna pivoq iliuusissanik pilersaarusiornermut atatillugu, takornarianik ilaasoqrnerulernissamik siunertaralugu nutaanik iniliortoqarmat igloo-suitenik premium-couchettenillu. Tamatuma ilutigisaanik siniffissat 246-niit 203-nut ikilisinneqarput, umiartorfissaq Nanortalimmiit Uummannap tungaanut takinerulersinneqarluni, umiartorneq akuttunerulerluni bilitsillu akisunerulerlutik.
Iliuusissamik pilersaarusiaq iluatsinngitsoq
Royal Arctic Linep ukiumoortumik nalunaarusiaa naapertorlugu, iliusissanik pilersaarusiut iluatsinngilaq. Taitsiannguaq Olsenili nassuiaavoq, ilaasut ukioq manna amerleqqittut.
- Ilulissanit Qaqortumut sapaatit akunnikkaartumik ingerlaarfik akillu nalinginnaasut ukioq manna uterfiginikuuagut. Taannalu malunnartorujussuuvoq. Ukumut 2024-mut sanilliukkaanni ilaasugut amerleqqinnikuupput.
Ullumikkulli Arctic Umiaq Line pisoqalisumik umiarsuaateqarput kiffartuussinissamillu isumaqatigiissummik piffissami sivisunerusumi toqqissisimatitsisinnaasumik naatsorsuutissaqanngilalat. Siunissallu suliffeqarfitoqqamut qanoq malitseqarnissaa, Taitsiannguaq Olsenipakiuminatsippaa.
- Qanoq politikkikkut aalajangertoqassanersoq apeqqutaalluinnarpoq, Taitsiannguaq Olsen oqarpoq.
Pisortaanerullu ilanngullugu oqaatigivaa, sinersortaammik umiartornerup periarfissaajuartikkusullugu. Naak umiartorluni sivisunerugaluartoq, umiartorneq silaannakkut angallannermut naleqqiullugu, sila allanngoraraluaraangalluunniit, ataavartumik ingerlanerummat.
