Ilisimatusarfik: Ilisimatusarneq nutaaq nunaqarfiit annaannissaannut aqqutissiuissasoq

Javier L. Arnaut Ilisimatuarfimmi allaffimmi mikisumi silap pissusianut aningaasaqarnermullu atuakkanik ulikkaartumiippoq.

Taanna Issittumi inuiaqatigiilernerinermik aningaasaqarnermillu ilisimatusarfimmi aqutsisuuvoq, taassumalu silap pissusiata allanngoriartornerata inuiaqatigiiaqqanut sunniuteqarnera ilisimatusarfigissavaa.

Qarasaasiap igalaasartaani naqinnerit angisuut atuarneqarsinnaapput: Revive.

Nunarput suliniummi nunaqarfiit qanoq annaanneqarsinnaanerannik aaqqiissutissarsiornermi siuttuussussanngorpoq. Suliniummi nunat Spania, Finland, Litau, Bulgaria Italialu peqataassapput.

Silap pissusiata allanngoriartornerata piniarnermut atugassaritaasunut ilungersunartorsiortitsineranni aamma inuusuttut Nuummut – imaluunniit Københavnimut noorarneranni – nunaqarfiit attanneqarnissaannut iliuuseqartoqartariaqarpoq.

Naggueqatigiit inuit Naalagaaffiit Peqatigiit silap pissusianut atatillugu aningaasaateqarfianit pissarsiaqarsinnaalernissaat Naalakkersuisut Danmark peqatigalugu ilungersuuteqarput.

Javier Arnautip aningaasat qanoq isumatusaarnerpaamik atorneqarsinnaanerannut apeqqut maanna misissuiffiginiarpaa.

Isumatusaartumik naleqqussarneq

Javier Arnautip nunat allat illoqarfiit minnerusut inuerukkiartornerannut qanoq misilittagaqarnersut aamma nunatta tamanna qanoq ilikkagaqarfigisinnaaneraa suliniummi nutaami misissuiffiginiarpaa.

Taassuma Narsap ukiut qulit ingerlaneranni qanoq ililluni 20 procentimik innuttaasukinnerulersimanera eqqaavaa.

Assi © : KNR / Markus Valentin

- Nunatsinni nunaqarfiit assersuutigalugu Finlandimi illoqarfinnik attassiniarnermut iliuuseqarniartoqarneranut imaluunniit illoqarfinnik inuerutitsiinnarniarnermut sanilliunneqarsinnaanissaa eqqarsaataavoq.

Javier Arnautip aaqqiissutissat isumatusaartumik naleqqussaanissatut taavai. Spaniamilu aaqqiissutissanik nutaanik pingaartumik misileraasoqarsimavoq.

Nunaqarfiit digitalikkut aaqqiissutinik atuiffiusut

Qaffasissumik ilinniagaqartut, kalaallit inuusuttut Danmarkimut nunanulluunniit allanut noorartarnerat ilisimaneqarluarpoq.

Taamaammat Javier Arnautip inuusuttut illoqarfinni annerusuni periarfissaqarnerusutut isiginninnatik nunaqarfinnut soqutiginnilersinnaanissaat misissorusuppaa.

Ullormi Inatsisartunut qinersisoqarnissaanik nalunaarutiginniffiusumi avatangiisinut naalakkersuisuusimasup Kalistat Lundip (IA) nunaqarfeeqqat FN-imit aningaasanik pissarsinissaat qanoq pisariaqartiginera oqaatigaa, taamaalillutik silap pissusiata allanngoriartorneranut naleqqussarsinnaaniassammata. Nunaqarfiit matuneqarnissaat periarfissatut kingulliunissaa tassani oqaluttuaraa tamannalu pinngitsoortinneqartariaqartoq. Assi © : KNR / Markus Valentin

Tassanilu internet sukkasooq immikkut ittumik pingaaruteqarpoq.

- Inuit attaveqaqatigiittarfii takornariartitsinerluunnit tunngavigalugit suliffeqarfimmik ingerlatsilernissamut internetimik atuisinnaanerulertoqarpat tamanna nunaqarfinni aningaasartuutit appartissinnaavai, ilisimatooq oqarpoq.

Internetikkut sulisartut immikkut ittumik taaneqartarput: Nomadet digitaliusut. Suleriaaserlu taamaattoq Spaniami pingaartinneqaleriartorpoq.

- Digital nomade-uguit arlalitsigut iluaqutissartaqarpoq, soorlu inimut akiliut appasinnerusoq, akileraarut appasinnerusoq innuttaassutsimillu ajornannginnerusumik pissarsisinnaaneq.

Taamaattorli nunaqavissunik nuuttunillu assigiinngisitsineq tamanit nuannarineqanngitsoq Javier Arnaut oqaluttuarpoq.

- Tamanna nunaqavissut ilaannit naapertuutinngitsutut isigineqarpoq, iluatsinnerali takusinnaavarput. Spaniami aningaasarsiorneq Europap agguaqatigiissillugu aningaasarsiorneranit siuariarneruvoq.

Sukuiaaneq

Kalaallit Nunaat FN-ip silap pissusianut naleqqussaanermut aningaasaataanik pissarsissappat ilinniartitaaneq aningaasaliiffigineqartariaqartoq, Ilisimatooq isumaqarpoq.

Taamaakkaluartoq ilisimatuut ilinniarsimasulluunniit Kalaallit Nunaanniit qimarratsikkumanagit, Ilisimatusarfiup inuit-inut qanoq naleqqussarneqarsinnaanera isiginiarneqassasoq isumaqarpoq.

- Suna tamarmi aningaasanut tunngassuteqanngilaq. Ilinniartut tamaanga atassuteqartutut misigissappata, avatangiisit pitsaasuunissaat aamma pingaaruteqarpoq. Ilinniartitaaneq kalaallit naleqartitaannit aallaaveqarniassammat naalakkersuisut Ilisimatusarfillu iliuuseqarnerusariaqarput.

Nunaqarfinnillu matooraannginnissamut kalaallit naleqartitaat anguniagaapput.

- Suna tamarmi missingersuutinik oqimaaqatigiissaarinermut tunnganngilaq. Piorsarsimassutsimiit isiginnittariaaseqarnissaq pingaaruteqarluinnarpoq. Aaqqiissutissat ingasattajaartut (assersuutigalugu nunaqarfiit matuneqarnissaat) innuttaasunit akuerineqarsinnaanissaat qularutigaara, Javier Arnaut oqarpoq.