Silap pissusia tunngavigalugu taarsiissutit: Danmark nunap inoqqaavinut aningaasassarsiorniartoq
Silap pissusianut tunngasuni ministeri Lars Aagaardip Nuummut tikeraarnerani nunatsinni mingutsitsinnginnerulernissaq ukkatarineqarpoq. Taasssuma silap pissusiata allanngoriartornera nunallu inoqqaavisa pisinnaatitaaffii pillugit KNR tikeraarnermini oqaloqatigaa.
Nuuk Water Taxip umiatsiaasa ilaat qatsunngarimmi kangerlukkut ingerlaarpoq.
Danmarkimi silap pissusianut tunngasuni ministeri Lars Aagaard (M) Sermitsiap kuuata qerisimasup alakkarnerani umiatsiap siornganiippoq.
Kalaallit Nunaat Parisimi isumaqatigiissummut juunimi ilannguppoq. Nunarsuup tunisassiornerup eqiterussaanngikkallarnerani kiassusianit 1,5 gradiinnarmik kiannerulerneranut killiliiniartusssamik taanna isumaqatigiissutaavoq.
Lars Aagaardillu aalajangerneq taamnna nuannaarutigaa.
- Nuannaarutigaara. Tassami nunat allat Korea avannarlermut, Yemenimut nunanullu allanut soqutiginarsinnaasunut isumaqataallutik isumaqatigiissummut ilaajunnaarneranni Kalaallit Nunaat ilanngulluni nalunaarmat pisut assortuuttuusipput.
Nunatsinni mingutsitsinnginnerulernissamut allannguiniarnermik taavalu nunatta Danmarkip tamatumani assigiinngissutaannik qallunaaq silap pissusianut tunngasuni ministeri maanna umeruivoq. Siullertulli Lars Aagaard Kalaallit Nunaannut tunngatillugu anguniagassaminik saqqumiussivoq:
- Nunat inoqqaavisa pisinnaatitaaffii pillugit suleqatigiinnerulernissaq, silap pissusia pillugu nunat tamalaat isumaqatigiinniarnissarsuanni tullermi ukkatarinerussavarput.
Nunat inoqqaavinut silap pissusia tunngavigalugu taarsiissutit
Lars Aagaardi Nuup kangerlua qimerloorujuujutigalugu qiimmaammerpoq. Nukappiaraallunimi Nuummi najugaqarluni angunni angalaaqatigikkajuttarsimavaa.
Nunatsinnilu pinngortitaq silap pissusia allanngoriartormat taamanerniit allanngupiloorsimavoq.
Taamaammallu Danmark silap pissusia pillugu ataatsimeersuartoqarnissaanut periusissiorsimavoq, nunap inoqqaavinut silap pissusiata allanngoriartorneranik misigisaqartunut, nunarsuarmi nunat aningaasanik amerlanerusunik tunniussinissaa anguniassallugu.
- Kalaallit Nunaat tassani qaninnerusumik suleqatigerusuppara. Danmark silap pissusiata allangoriartornera pillugu isumaqatigiinniarnissarsuarmi tullermi EU-mi siulittaasuussaaq, tassanilu Kalaallit nunaanni takussaasunut tunngasunik isummanik ilanngussinissatsinnut periarfissaqassaagut.
Nunat inoqqaavisa pisinnaatitaaffii silap pissusianut tunngasuni ataatsimeersuarnermut atassuserukkit, taava tigussaasut suut sulissutigissavisigit?
- Silap pissusianut aningaasaliinerusinnaavoq, annerusumik Issittumi nunat inoqqaavi silap pissusiata allanngoriartorneranik misigisaqartuusut pinerullugit anguniagaqarnissaq. Aningaasaliineq inuiannut kalaallinut iluaqutaasinnaavoq. Aaqqiissuteqarfigisinnaagutsigu ikiuutikutsoorusuppunga, silap pissusianut tunngasuni ministeri naggasiivoq.
