Ilisimatusarfik decembarip aallaqqaataani rektoritaassaaq
Gitte Adler Reimer Ilisimatusarfimmi ukiuni arfineq-pingasuni rektorioreerluni soraartoq, sapaatip-akunnera kingulleq saqqummiunneqarpoq.
Taassuma kingoraartissaa nassaarigitsik Ilisimatusarfimmi siulersuisut ullumi nalunaarutigaat.
Mari Kleist pisortatigoortumik decembarip aallaqqaataani atorfinittussanngorpoq. Taannali Gitte Adler Reimerip sulinngiffeqarnerani rektorimut sinniisuugallarluni qaammat una sulereersimalerpoq.
Mari Kleist Kulturimik, Oqaatsinik Oqaluttuarisaanermillu Ilisimatusarfimmi pisortatut lektoritullu tunuliaqutaqarpoq. Taanna Ilisimatusarfimmi februaarip aallaqqaataanili prorektoriuvoq.
Mari Kleistip toqqarneqarneranut atatillugu Ilisimatusarfimmi siulersuisuni siulittaasoq tusagassiuutinut nalunaarummi allappoq:
- Taanna aqutsisutut nukittuujullunilu aallarnisaanermut takorluuisinnaasuuvoq, ilisimatusarfiullu aamma tamatuma inuiaqatigiinni pingaaruteqassusaa ilisimalluarpai. Marip Ilisimatusarfimmi rektorinngortinneqarnermini suliatigut pingaarnerit aamma aaqqissugaanermik paasisimasaqarluarnini aqutsinermini ataqatigiitsissavai.
Rektoritaassatut toqqarneqarneqarnini tulluusimaarutigalugu tusagassiuutinut nalunaarummi tassani oqaatigaa.
- Ilisimatusarfik inuiaqatitsinni pingaaruteqarluinnartutut atuuffeqarpoq - suleqatit aamma ilinniartut peqatigalugit Ilisimatusarfiup nukittuuginnarnissaanut ammasuunissaanullu suliap nanginnissaa qilanaaraara, Mari Kleist oqarpoq.
Rektoriusimasumut Gitte Adler Reimerimut naggataartitsilluni Ilimmarfimmi novembarip 28-anni ilasseqatigiittoqassaaq.
