Ilisimatusarfimmi ilinnialernissaq nunanit allaneersunit soqutigineqarluartoq

Januaari naasoq Nuummi Ilisimatusarfimmi ilinniartut tikeraat aqqaneq-marluk nunanit allaneersut tikilluaqquneqarput. Ilinniartut ilaatigut Danmarkimeersut, Finlandimeersut, Frankrigimeersut, Japanimeersut Kinameersullu.

Ilisimatusarfimmi attaveqaqatigiinnermik suliallip Per Arnfjordip oqaatigaa nunanit allaneersut Ilisimatusarfimmut ilinniariarusuttut amerliartortut.

- Soqutigineqarluarpoq. Taamaakkaluartoq ilinniartunut ineqarfinni inissat ikimmata akuerisinnaasagut killeqartarput, taanna allakkatigut taama akissuteqarpoq.

Ilinniartut nunanit allaneersut Inuiaqatigiilerinermut kulturimullu tunngasunik ilinniagaqartut taassuma ilanngullugu paasissutissiissutigaa.

Semesterit tamaasa ilinniartut nunanit tamalaaneersut 

Semesterit tamaasa ilinniartut nunanit allaneersut 15-20-t missaanniittut Ilisimatusarfimmi ilinnialertarput, tassa imaappoq ukiumut 30-40 missaaniittut. Paarlattuanillu Ilisimatusarfimmi ilinniartut nunatsinni najugallit nunanut allanut aamma atuarnermi ilaani ilinniariartarput; ingammik nunanut avannarlernut, USA-mut Canadamullu.

- Semesterip ingerlanerani ilinniartutut tikeraartuutitta malinnaaviginissaat qilanaaraarput - neriuppugullu maaniinnertik puigunaatsumik misigisaqarfigiumaaraat, Per Arnfjord oqarpoq.

Ilinniartut januaari naasoq aallartimmata pitsaanerpaamik aallartilluarnissaat qulakkeerniarlugu Ilisimatusarfik pillugu saqqummiisoqarpoq, nunatsinni inuunermut tunngasunik paasissutissiisoqarluni, kiisalu Campus Ilimmarfimmi takornariartitsisoqarluni.