Ilinniartut namminiilivinnissaq pillugu paasissutissaalatsisut

KNR-ip nunatsinni inuusuttut ilinniarfiini ilinniartut nunatta namminersulivinnissaa pillugu isumasiorpai.

Allattoq Rasmus Balle Hansen

februaarip 17-at 2025 13:52

Nutserisoq Nathan Kreutzmann, Hanne Petersen

KNR-ip nunatsinni inuusuttut ilinniarfiini ilinniartut namminersulivinnissaq pillugu apeqqutinik akisassartalinnik immersugassippai, nunarpullu maanna namminiilivittariaqanngitsoq amerlanerussutillit isumaqarput.

Namminiilivinnissamulli ilumut piareersimanitsinnik naammattumik paasissutissutissinneqarsimasutut misigisimanermut tunngatillugu allatut isumaqartut erserpoq: Amerlanerussutillimmi namminersulivinnerup sunik nassataqarsinnaaneranik naammanngitsumik paasissutissinneqartarsoripput.

Aamma atuarukInuusuttut inuiaqatigiinni oqallinnermi ilaanngillat

Nunarput maanna namminiilivittariaqartoq, 46 procentii isumaqarput, massa 54 procentii akerliusut.

Namminersulivinnissarli pillugu naammattumik paasissutissutissinneqarsimasutut misigisimanermut tunngatillugu allatorluinnaq isumaqartut erserpoq: Naammattumimmi paasissutissinneqartarnatik, 74 procentii isumaqarput, massa 26 procentii naammattumik paasissutissinneqartarnerartut.

Isumasiuineq naatsumik

KNR-ip nunatsinni inuusuttut ilinniarfiini ilinniartut nunatta namminersulivinnissaa pillugu apeqqutinik qitiusunik marlunnik akisassartalimmik immersuisinnerisigut isumasiorpai:

Kalaallit Nunaat massakkut namminiilivissava?
Namminiilivinnissaq pillugu naammattumik paasissutissinneqartarlutit misigisimavit?

Nuummi, Sisimiuni, Ilulissani Qaqortumilu inuusuttut ilinniarfiini ilinniartut isumasiunermi peqataasut 192-iupput. Isumasiuineq ilisimatusarnermik aallaaveqanngikkaluartoq nunatsinnilu inuusuttut tamarmik isumasiorneqanngikkaluartut, tamatumunnga qanoq isumaqarnersut erserpoq.

Allisiguk

Ukkatarineqartoq

Nunarput qaammatini kingullerni ukkatarineqaqaaq. Politikerit oqallinnerat qinersinissatta qalliartornera ilutigalugu sakkortusiartorpoq, namminiilivinnisamullu apeqqut qineqqusaarnermi qitiungaatsialerluni.

Taamaammat inuusuttut nunatsinni siunissami namminersortuusumi sulisussat kinguaariinnilu tulliullutik nunamik aqutsisussat eqqaamaneqarnissaat pingaaruteqarpoq.

Naak misissuineq tamat isummernerannik eqqortumik ersersitsinngikkaluartoq, ilinniartut sisamaagaangata pingasut naammattumik paasissutissinneqarsimanatik misigisimanerat ersareqaaq. Taamaammat apererusunnarpoq: Ilinniartut uani inuiaqatigiinnut tunngasumik oqallissummi pingaartumi naammattumik akuutinneqarlutillu paasissutissinneqartarpat?

Taamaannersoq KNR-ip sapaatit akunnerata massuma ingerlanerani akissutissarsiorniarpaa.

NAMMINIILIVINNISSAQ UKKATARINEQARTOQ

Inatsisartunut marsip aqqarngani qinersissaagut.

Namminiilivinnissaq qitiungaatsialeqqippoq, nunatta namminiilivinnissamut alloriarnermut tullermut ikaarsaarnissaa piffissanngortoq - USA-lu nunatsinnik aqutsinissamik soqutiginninneruleriartortoq - naalakkersuisut siulittaasuata Múte B. Egedep ukiortaami oqalugiarnermi oqaatigereeraalu.

Taamaammat KNR namminiilivinnissaq ukkataralugu sapaatit akunnerata massuma ingerlanerani arlalinnik nutaarsiassiissaaq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.