Inuusuttut inuiaqatigiinni oqallinnermi ilaanngillat

Nunarput ulluni makkunani oqallisaangaatsiarpoq, tassa USA-mi Præsidentip Donald Trumpip nunarput pisiarerusullugu Januarimi oqaatiginikuuaa.

Taassuma kingorna oqallittoqangaatsiarpoq, oqallinnerli tamaanga naanngilaq, marlunngormarmammi Múte B. Egedep Inatsisartunut qinersinissaq suaarutigaa.

Oqallinnernut tunngatillugu KNR-ip Ilisimatusarfimmi ilinniartut oqallinnerit pillugit politikkerillu inuusuttunut saaffiginnittarneri pillugit paasiniaaffigaagut. KNR-ip inuusuttut oqaloqatigisai isumaqataanngillat.

Nunatsinni politikkikkut oqallinnernut peqataasarpit?

Aviaq Kristoffersen Ilisimatusarfimmi ilinniartitsisunngorniartuuvoq. Assi © : Henriette Simonsen / KNR

- Facebookikkut saqqummertut atuallattaaginnaavippakka Demokraatiminngaanneertut, sinneriunngittut, Aviaq Kristoffersen oqarpoq.

Ilisimatusarfimmi naapitatta ilaat Inuk Knudsen oqallinnerni oqalliseqataanngikkaluarluni malinnaaffigisarpai.

Inuk Knudsen Ilisimatusarfimmi ilinniartuuvoq, inoqatinut attaveqaatitigullu oqallinnerit malinnaaffigisarpai. Assi © : Henriette Simonsen / KNR

- Oqalliseqataaneq ajoraluarlunga kisianni malinnaaffigisarpakka, soorlu nunarsuarmi pisut aallaavigalugit maannakkut takussaasorujussuupput.

Takussaanerunissaat amigaataavoq

Angerlannguaq Abelsenip Inuk Knudsenitulli oqallinnerit inoqatinut attaveqaatini takullattaasaraluarlugit soqutigivallaannginnerarpai.

Politikkerit takussaanerusuuppata oqallinnernut malinnaanissaq ajornannginnerussasoq Angerlannguaq Abelsenip oqaatigaa. Assi © : Henriette Simonsen / KNR

- Soorlu aatsaat qinersisoqaleraangat aatsaat saqqummertut ikannerusaramik taava malinnaanissaq ilaa ulluinnarsiutiginnginnatsigu taava immaqa nuisanerusuuppata malinnaanarnerusimassagaluarpoq, Angerlannguaq Abelsen oqarpoq.

Politikkikkut oqallinneq qanoq isumaqarfigineraat aperaagut.

Illit isumaqarpit oqallinneq sakkortusoq?

- Massakkuffaarik soorlu sakkortuutut taaneqarsinnaavoq nunarput pilerigineqartorujussuuvoq sumi tamaaninngaanniit, Inuk Knudsen oqarpoq.

Angerlannguaq Abelsenilli oqallinneq sakkukippallaarsoraa.

- Uanga isumanni immaqa sakkukippallaarpoq, tassami soorlu sakkortuut soorlu toqqorterlugit pisaramik, soorlu ilaqutariinnermut tunngasut tamakkua uanga eqqarsaatigineruakka, taanna oqarpoq nangillunilu:

- Makkua meeqqat eqqarsaatigalugit ilinniartitsisunngorniartuusutut meeqqat malinnaaffigalugit takuneqarsinnaanerusaramik, Angerlannguaq Abelsen oqarpoq.

Politikerit inuusuttunut saaffiginnittarnerat illit naammaginartippiuk?

- Suu, saqqummertartut aamma inuusussiartuinnarput, Aviaq Kristoffersen oqarpoq.

Inuk Knudsenip tamanna aamma naammaginartutut isigaa.

- Ija naammaginartutut isigivara pissutigalugu sociale mediemi imminnut saqqummiutiinnavillutik maannakkut takussaasorujussuupput ulluni kingullerni, Inuk Knudsen oqarpoq.

Angerlannguaq Abelsenili allatut isumaqarpoq.

- Uanga isumaqarpunga politikerit inuusuttunut saaffiginninngippallaartut, nuimanngillat. Soorlu ilinniarfeqarfinnulluunniit saqqummiiartortartuugunik orniginarnerussagaluarput.