Múte B. Egedep qinersinissamik suaaruteqarneranut qisuariaatit aaku

Naalakkersuisut siulittaasuata, Múte B. Egedep nunatsinni innuttaasut 2025-mi marsip aqqarnani qinersinissaat marlunngornermi ualikkut siunnersuutigaa.

Taassuma tamanna facebookimi quppernermini saqqummiuppaa, kingornalu Inatsisartut ataatsimiittarfianni saqqummiullugu.

Partiillu tamarmik akuersipput.

Qinersisoqarnissaatali suaarutigineqaratarnissaanut oqallinnerit naalakkersuisut siulittaasuata pisortatigoortumik nammineq nalunaaruteqannginnerani aallartipput.

KNR-ip partiimi siulittaasut arlallit Múte B. Egedep ataatsimiittarfimmi oqaaseqannginnerani oqaloqatigai.

- Naalakkersuisooqatigiit killiffeqarnerat tukattumik sulineq kiisami tamaanga killinnialerpoq. Kiisami innuttaasut aalajangissavaat siunissaq kikkut aqqutissiussaneraat, Naleqqap siulittaasua,Pele Broberg oqarpoq.

Piffissaq qinersinissamik oqalliffiusoq

Taassuma apersorneqarnera Jens Napãtôᴋ iserluni qinersinissamut nutaarsiassamik oqaaseqarmat unitsinneqarpoq.

- Qinersinissaq suaarutigineqalerpoq, taanna oqarpoq.

Demokraatit siulittaasuat, Jens Frederik Nielsen qinersinissap suaarutigineqarnera pillugu ima oqarpoq:

- Ukiut sisamat ingerlanikuupput. Uparuagassat uparuartarnikuuagut maannakkulli innuttaasut nalilersortussanngorpaat naammagisimanerlugu aqutsineq imaluunniit silaannaq allanngorluinnassanersoq Naalakkersuisoqarfinni.

Inuit Ataqatigiit siulittaasua assingulluinnartumik oqaaseqarpoq.

- Maannakkut apeqqut inuiaqatigiinnut igipparput, nunap inissisimaffia maannakkut, Aqqaluaq B. Egede oqarpoq.

Siumumit qinersinissamut piffissanngortoq aamma isumaqarpoq.

- Isumaqarpunga aamma masssakkut ataatsimiinneq annertuumik qineqqusaarnermik ingerlanneqartoq aammali isumaqarpunga pissusissamisuuginnartoq maannakkumut tassunga killinnissarput, Doris Jakobsen Jensen oqarpoq.

Marsip aqqarnani qinersisoqarnissaanut siunnersuut taasissutigineqarmat Inatsisartuni isumaqatigiittoqarpoq. Marsip ulluisa aqqarnanni qinersisoqassaaq.