Múte B. Egede marsip aqqarnani qinersisoqarnissaa siunnersuutigaa - ullorlu taanna qinersisoqassaaq

"Piffissanngorpoq inuiaat kalaallit Inatsisartunut qinersinissaat. Suaaruteqarninnullu Inatsisartut akuersissappata tamanna pissaaq 11.marts. Piffissaq imaannaanngitsoq aatsaallu taamak unammillernartigisoq nunatut nalaapparput. Piffissaanngilaq avissaartuunnissarput. Suliassaqarpugummi annertuunik nunarput pillugu suleqatigiinnissamik katersuuffissarsiornermillu pisussaaffiliisunik. Nukissaqarluarpunga illit nunarpullu sullisissallutit aamma siuttuuffigeqqissallusi"

Múte B. Egede Facebookikkut allappoq.

Naalakkersuisut siulittaasut kinaassutsimik isertuussisunit nunanillu allanit tapiissuteqartoqarsinnaaneranut inerteqquteqarnissamut inatsisit nutaaq Inatsisartuni akuerineqarniariartoq facebookikkut allappoq.

Inatsissatut siunnersuut ullumi tuaviortumik suliarineqarlunilu akuerineqarpoq, inatsillu nunanit allanit aamma kinaassutsimik isertuussillutik annertuumik tapiissuteqarniartut nunatsinni politikkikkut suliaqarnermut sunniuteqannginnissaat siunertaavoq.

Inatsisartuni ataatsimiinnermi nalunaaqutaq 15.30-p tungaanut unikkartoqarpoq. Ataatsimiinnerup aallarteqqinnissaa 16.15-imut kinguartinneqaqqippoq. Ataatsimiittarfimmi qinikkat imminnut assilisaareerlutik aallarteqqipput.

Taasisoqapallanneratigut inatsisartunut qinersinisssamut ulloq marsip aqqarnat tamakkiisumik akuerineqarpoq. Ataatsiinnermut takkuttut 30-t tamarmik akuersipput.

Múte B. Egedelu oqaaseqartarfimmut oqarpoq:

- Naalakkersuisunit marsip aqqarnat qinersinissamut ullutut aalajangerparput. Qinersinissap suaarutigineqarnerani sapaatit akunneri arfinillit nalinginnaasumik ingerlasartussaapput, kisianni nunatsinni nunanilu allani politikkut maanna pisoqangaatsiarpoq, taamaammat ullulernera tuaviuutikannerparput. Partiit qineqqusaarnerup sivikinnerunissaa aamma oqaluuserineqarpoq.

- Naalagaaffinngornissamullu suliami pingaartumik aamma alloriarnermik aallartitisoqarpoq. Nunarput piffissami matumani ukkatarineqangaatsiarpoq.

Inatsisartunut 2021-mi apriilip arfernani kingullermik qinersisoqarpoq.

Taamani Inuit Ataqatigiit qinigaanerpaapput – qineqqusaarnermilu uranip inerteqqutigineqalernissaa sammineqarnerulluni. Narsap eqqaani aatsitassarsiornissamut pilersaarut uranimilli saniatigut piiaaffiusussap piviusunngungajalernera pissutigalugu tassunga tunnganeruvoq. Nunatta kujataani nunatsinnilu sumiiffinni allani uranimut akerliorrapput, IA-lu naalakkersuisuni siulittaasuunissamut qinigaanerpaaginnarani Kommune Kujallermi ilisimaneqartutut Narsap sumiiffigisaani aamma borgmesteriuteqalerpoq.

IA 37 procentit missaannik taaguunneqarpoq Inatsisartunullu 31-nik ilaasortaqarfiusumut aqqaneq-marlunnik qinigaatitaqarluni.

Maannakkut qinersineq uranimik piianissamut tunnganani allamut tunnganissaa ilimanaateqarluarpoq. Nunarpummi USA-p præsidentiata, Donald Trumpip nunatsinnik aqutsilerusunnerminik arlaleriarluni oqariartuuteqarnerata kingunerisaanik nunarsuup ilarujussuani ukkatarineqangaatsiarpoq.

Aqutsilerniarnera Múte B. Egedemit ministeriunermillu Mette Frederiksenimit (S) itigartitsissutigineqarallarnikuuvoq.

Apriilip aallaqqaataani aamma qinersisoqartussaavoq - tamatumuuna kommunimut qinersisoqassalluni.