Tusagassiuut: Canada sinniisoqarfimmik Nuummi ammaalersoq
Canada sinniisoqarfimmik Nuummi sapaatip akunnerani matumani ammaassaaq.
Canadami tusagassiornermi innuttaasunik kiffartuussisussaatitaasoq CBC taama allaaserisaqarpoq.
Tusagassiorfiup nalunaarutaa naapertorlugu sinniisoqarfiup Islandip sinniisoqarfia Nuutoqqamiittoq illumik avitseqatigissavaa.
Canadap nunanut allanut ministeriata, Anita Anandip sinniisoqarfimmik ammaanissamut atatillugu Nuuliarnissani CBC-mut paasissutissiissutigaa.
- Nunap immikkoortuani politikkikkut pissutsit allanngorarneranni Issittumi nunatut pingaaruteqartutut atuutilernissarput qulakkeerniarsaraarput, Anita Anand CBC-mut oqarpoq.
Tusagassiorfiulli sinniisoqarfik qassinik sulisoqassanersoq kinalu sinniisunngussanersoq akissutissarsinngilaa.
Danskit nunanut allanut ministeriat, Lars Løkke Rasmussen aamma nunanut allanut naalakkersuisoq, Vivian Motzfeldt ammaanersiornermut peqataanissaat naatsorsuutigineqartoq, CBC allappoq.
KNR-ip nunanut allanut naalakkersuisoqarfik, nunanut allanut ministereqarfik Canadallu aallartitaqarfiat attaveqarfigai. Taakkuli suliamut atatillugu oqaaseqaateqanngillat.
