Inuit Pisinnaatitaaffii pillugit Siunnersuisoqatigiit suliniummut 200.000 koruuninik aningaasaliiffigineqartut

Atortorissaarusiornikkut nunatsinni inuit pisinnaatitaaffiisa ineriartornerinik unammillernarsinnaaffiisa sumiiffissineratigut aammalu uppernarsaaserneratigut malinnaasinnaanissamut suliniut periarfissiissaaq.

Allattoq Ivalu Nivi Johansen

novembarip 25-at 2025 16:22

Nutserisoq Karla Heilmann

Inuit Pisinnaatitaaffii pillugit Siunnersuisoqatigiit Namminersorlutik Oqartussat ataani Tips aamma Lotto-miit, ilisimasanik katersuivittaarnissamut suliniummut, januaarimi 2026-mi aallartittussamut aningaasaliiffigineqarput.

Suliniummi nunat inatsisiliaat, iliuusissatut pilersaarutaat, periaasii, misissuineri kisitsisillu immikkoortuni sisamani toqqarneqartuni misissorneqassapput.

Inuit Pisinnaatitaaffii pillugit Siunnersuisoqatigiit tusagassiuutinut nalunaarummi taama allapput.

IPS-IP IMMIKKOORTUT UKU MISISSUIFFIGISSAVAI:

1. Nammineq aalajangiisinnaatitaaneq.

2. Inatsisitigut illersuineq, eqqartuussivinnik atuisinnaaneq aamma inatsisitigut periarfissat.

3. Aningaasaqarnikkut innuttaaqatigiinnilu ineriartorneq.

4. Ilinniartitaaneq.

- Nunatsinni inuit pisinnaatitaaffiisa inissisimanerat pillugu erseqqissumik paasissutissanik ilisimasanillu takussutissiisinnaasumik katersiviusumillu amigaateqangaatsiarpugut, Inuit Pisinnaatitaaffii pillugit Siunnersuisoqatigiinni siulittaasoq Tukumminngiaq Olsen Lyberth oqaluttuarpoq.

Inuit pisinnaatitaaffii pillugit ilisimasakinnerup, pisinnaatitaaffiit illersornissaannut ajornartorsiutaangaatsiartoq, Tukumminngiaq Olsen Lyberthip tusagassiuutinut nalunaarummi allappoq.

Ilisimasat illersuinissamut pingaaruteqarput

Atortorissaarut Indiginous Navigator Tool (INT)-mik atilik Namminersorlutik Oqartussanit aningaasaliiffigineqassaaq.

Atortorissaarutip inuit pisinnaatitaaffiisa ajornartorsiorfiini sumiiffissillugillu uppernarsaasissavaat, taannalu kikkunnut tamanut ammassaaq akeqarnanilu.

Paasissutissanik amigaateqarneq innuttaasumut tamanna navialineqarnissamut, naligiinngisitsinermik assigiinngisitsinermillu kinguneqarsinnaasoq, siulittaasoq oqarpoq.

Oqartussanut aalajangiisartunullu paasissutissanik amigaateqarneq ajornartorsiortitsisinnaasoq Tukumminngiaq Olsen Lyberth oqaluttuarpoq. Ajornartorsiullu tassaavoq, oqartussat aalajangiisartullu eqqortunik aalaakkaasunillu ilisimasanik tunngaveqarlutik iliuuseqarsinnaanerat ajornakusoortilersinnaammagu.

- Suliniutip siunertaraa inuit pisinnaatitaaffiisa inissisimanerat ataatsimut isigalugu takusinnaanngorumallugu paasissutissanik katersuineq, Tukumminngiaq Olsen Lyberth tusagassiuutinut nalunaarummi oqaaseqaateqarpoq.

Inuit pisinnaatitaaffii pillugit nunat tamalaat akornanni suliniaqatigiiffiit ukiut ingerlaneranni Kalaallit Nunaannut erseqqissaatigisarsimavaat inuit pisinnaatitaaffiinik illersuinermi ilisimasakippallaarneq ajornartorsiutaasartoq, Tukumminngiaq Olsen Lyberth tusagassiuutinut nalunaarummi nassuiaavoq.

- Paasissutissat ilisimasallu piviusut tunngavigalugit aalajangiisartut inatsisinik aaqqissuussaanermullu tunngasunik innuttaasut inuunerannik pitsanngorsaataasumik allannguinissamut periarfissaqarnerussapput, tamannalu inuiaqatigiit atugarissaarnerunissaannut iluaqutaassaaq, Tukumminngiaq Olsen Lyberth naggasiivoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.