Umiatsiaaqqanik nalunaarsuinissamut killiliussaq attatiinnarneqartoq
Umiatsiaaqqanik nalunaarsuinissamut immersuiffissaq aalisartut piniartullu aalisarnermut akuersissummik ukiup naannginnerani pissarsisariaqartut akornanni ernumassutigineqangaatsiarpoq.
Aalisarnermut, Piniarnermut, Nunalerinermut Imminullu Pilersornermut, Avatangiisinullu Naalakkersuisup, Peter Borgip naak nalunaarsuinissamut kinguartitsinermik kissaateqartoqarnera paasisinnaanerarluarlugu ernumanissamut pissutissaqannginnerarpaa.
Ukiorli naangajalerpat kinguartitsinissaq periarfissaanngilaq.
- Aalisarneq pillugu inatsimmi taanna killigititaq allaqqavoq. Inatsimmillu allanngortitsissagaanni inatsisilerinermut suleriaatsit malillugit massakkut piffissaq imaalereermat inatsisinik allannguinissaq angumerineqarsinnaanngilaq, Peter Borg oqarpoq.
Ukiup affaanik kinguartitseqqusisoq
Umiatsiaaqqat sinerissap qanittuani inuussutissarsiornermut atorneqartut normulersorneqassapput.
Immersugassarli aallaqqaammut danskisuinnaq allaqqammat, aalisartorpassuillu danskisut allassinnaanatillu atuarsinnaanngimmata, ilaallu qarasaasiaqarnatik sivikinnerpaamik ukiup affaanik kinguartitsisoqarnissaa KNAPK-p piumasaraa.
- Tassa soorunami taanna peqqussut allatut ajornartumik malittariaqarparput aamma immersuisariaqarpugut. Kisianni kattuffimmiit kinguartinneqarnissaa taanna piumasaraarput, KNAPK-p siulittaasuata tullersortaa, Jens Peter Kielsen oqarpoq.
Naalakkersuisoq: Ernumanissamut tunngavissaqanngilaq
Umiatsiaaqqat meterit arfinillit ataallugit angissusillit inuussutissarsiutitut atorneqartut normulersorneqartussaanerat pillugu immersugassaq Danmarkimi Imarsiornermik Qullersaqarfimmiit aaqqissugaasoq Peter Borg oqarpoq. Naalakkersuisup aalisartut immersuinissamut nassiussinissamullu periarfissaqarluarnerarpai.
- Periarfissaqartippaat ukioq 2026 naallugu nalunaarsuinermik ingerlatsinermik suliaqartoqarsinnaasoq. Taamaallaat ukiup aallartinnissaannut piumasaqaataaginnarluni angallatip nalunaarsornissaanut qinnuteqaat siulleq tunniunneqarsimassasoq, naalakkersuisoq oqarpoq.
Aalisartut piniartullu umiatsiaaqqaminnik ukioq naatinnagu nalunaarsuinngikkunik, aalisarsinnaanermut akuersissummik tunineqanngitsoorsinnaanissartik ernumassutigisariaqanngikkaat naalakkersuisup nassuiaatigaa.
- Angallatertik nalunaarsortinniarlugu nalunaaruteqarsimagunik pappialaq taanna aallarniutaasoq tunniussimagunikku akuersissummik pissarsinngitsoornissaminnut ernumassutissaqanngillat.
Peter Borgip nalunaarsuinissamut immersugassaq kalaallisuunngortinneqareersoq aamma oqaatigaa.
