Politikeriusimasoq Mikael Petersen toquvoq

Uummannap kommunalbestyrelserisimasaani, Inatsisartuni naalakkersuisunilu ilaasortaasimasoq sivikitsumik napparsimareerluni toqusoq, partii qinikkatut sulinermini tunuliaqutigisaa Siumut facebookimi allappoq.
Assi © : KNR
Allattoq Jens Thorin
novembarip 25-at 2025 13:56

Mikael Petersen sivikitsumik napparsimareerluni toquvoq.  Siumut KNAPK-lu taama allapput. 

Taanna naalakkersuinikkut ukiorpassuarni suleqataasimavoq. 

Uummannap Kommunerisimasaani kommunalbestyrelsemut 1983-mi qinigaaqqaarpoq, tassanilu borgmesterip tulliatut inissisimasarsimalluni. 

Inatsisartunut siullermik 1987-imiit 1991-imut, taava aamma 1995-miit 2002-ip tungaanut ilaasortaavoq. 

Aamma naalakkersuisunut piffissani marlunni ilaasortaavoq.

Isumaginninnermut, Suliffeqarnermut Pisortallu Suliassaqarfiannut 1997-miit 1999-imut Naalakkersuisuuvoq.  Taava aamma Ineqarnermut, Aatsitassanut Avatangiisinullu Naalakkersuisutut 2002-miit 2004-imut ilaasortaavoq. 

- Miija tassaavoq angut politikkikkut eqqarsartoq nunaminullu sullissiuartuulluni. Isummersortarnermigut siumut isigisumik periuseqartuarpoq, Siumup siulittaasua Aleqa Hammond allappoq. 

Mikael Petersen piffissami suliffigisamini kingullermi aalisartut piniartullu kattuffianni KNAPK-mi siunnersortaanertut pisortallu tulliatut sulivoq. 

KNAPK-p siulittaasua, Pele Blytmann, aamma eqqaaniaavoq:

- Qiimmassaasarnini, kissalaartuunini ilakkuminartuuninilu pillugit ikinngut suleqallu pitsaasoq maqaasissavarput, taassumami suleqatini aqqusaakkat suugaluartut atortillugit tapersersortuarmagit.

Miija Niaqornani oktobarip aallaqqaataani 1956-imi inunngorpoq. Maskinistitut Ålborgimi 1977-mi ilinniagaqartuuvoq.

Nulia Oda, meeraalu inersimasut pingasut aammalu ernutai sisamat qimataapput.