Naalakkersuisoq: Sanaartornermi akit qaffakkiartuinnassasut

Nunap ilarujussuani inissaaleqisoqaleraluttuinnarpoq, Nuummilu Iserit aqqutigalugu inuit inissianut utaqqisut 2.000-ngajaapput.

Illoqarfinni nunaqarfinnilu allani ilaqutariit kinguaariaallutik najugaqatigiipput, ilai inissaaleqineq pissutigalugu, illoqarfinni anginerusuni ilinniarnissaminnik suliffissaminnilluunniit taamaatitsiinnartarput.

Tamanna ilutigalugu nutaanik sanaartornermi akit qaffakkaluttuinnarput.

Naalakkersuisut aningaasaqarneq pillugu nassuiaataat naapertorlugu, sanaartugassanut kvadratmeterimut akit 1.000 koruunit missaannik qaffannissaat naatsorsuutigineqarpoq. Ineriartorneq assartuussinermut akit qaffasinnerulernerinit atortut akiisa qaffannerinut pissuteqarpoq, tassami suna tamapajaarluinnaat eqqussuussassaasarmata. 

Nunatsinni sanatitsisut annersaattut Namminersorlutik Oqartussat akit qaffakkiartornerat aamma misigaat, Isumaginninnermut, Suliffeqarnermut, Ineqarnermut, Attaveqaasersuutinut Isorliunerusunullu Naalakkersuisoq Aqqaluaq B. Egede oqaluttuarpoq.

- Nunarsuarmi aningaasaqarnermi ineriartornerit, taakkununngalu nukissiornermut assartuussinermullu akit, aammalu nunarsuarmi aaqqiagiinnginnerit ingerlaannarneri ilanngullugit, illuliortiternermi sanaartornermilu akinut sunniuteqarput, aammalu pisortani sanatitsisunut namminersortunillu eqquillutik, taanna KNR-imut allakkatigut akissummini oqaluttuarpoq.

Najukkanittaaq pissutsit sulisussanik pissarsisinnaanerup killeqarnera, neqerooruteqartitsinermilu unammilleqatigiinnerup annikinnerata akit qaffakkiartornerinut kinguaattoorsinnaanernullu pisooqataasut taassuma erseqqissaatigaa. Naalakkersuisoq naapertorlugu, sanaartornerit ikileriangaatsianngillat, akilli qaffasissusii pillugit erseqqissitinnagit ‘aallartinneqarnissamut utaqqitinneqarput’. 

Inissiat akisuneruleratarsinnaanerat ilungersunartorsiornerlu

Sanaartorneq akitsorpat inissarsinissaq aamma akisunerulissaaq.

Sanatitsisunut namminersortunut tamanna ineqarnermut akiliutit qaffasinnerunerinik, taamaalillunilu inissianik niueruteqarnerup, piumaneqarneri inissianik neqeroorutiniit qaffasinneroreeraluartut, tatineqarneruneranik kinguneqarsinnaavoq. 

Sanaartornermi akit ineriartornerat imminermini inissianik niueruteqarnerup annertunerulerneranik kinguneqartitsisussaanngitsoq, Aqqaluaq B. Egede naliliivoq. Sanaartornermi inissiallu akii imminermini ajornartorsiutaanngillat, sanaartortoqarpallaanngiinnartoruna. Pingaartumik illoqarfinni anginerusuni soorlu Nuummi.

Aqqaluaq B. Egede naapertorlugu, ineqarnermik aaqqissuusseqqinnermi ukiup aallartinnerani akuersissutigineqartumi suliassat agguarneqarneri ersarinnerulissapput. Pisortat inunnut namminneerlutik inissianik pissarsinissamut periarfissaqanngitsunut inissianik qulakkeerissapput, kiisalu aningaasaqarneq eqqarsaatigalugu akissallit namminersortut inissianik niueruteqarnerannik atuissapput taamaalillutik “siunnerfilimmik piujuartitsinermillu inissianik pilersuisinnaaneq” qulakkeerneqassaaq.

Nuttarsinnaaneq ineriartornerlu inissaaleqinerup kigaallatsissinnaavai 

Inissiat akii inissaaleqinerlu pitsaanngitsunik malitseqarput.

Inuit sinerissamiit Nuummut suliartorlutik ilinniariartorlutilluunniit nuussimasut, inissiamilli nassaarsinnaannginnamik akissaqannginnamilluunniit uteqqittariaqartut Nuummi misigineqartarpoq.

Naalakkersuisoq naapertorlugu, inunnut ataasiakkaanut nunamullu kinguneqartarpoq. 

- Inissianik amigaateqarneq suliffeqarfinni nuttarsinnaanermik ilinnialersinnaanermillu unikaallatsitsisinnaavoq. Inuit Nuummi illoqarfinniluunniit annerusuni inissiamik nassaarsinnaanngikkaangamik najugaqarfigisimasaminnut utertariaqartarpata, tamanna inuit ataasiakkaat periarfissaannut aammalu inuiaqatigiit ineriartorneranut tamarmiusumut killiliisussaavoq, taanna allappoq.

Aaqqissuusseqqinneq nuttarsinnaanermut, inissiallu amigaataanerinut, ilinniarnissamut najukkanilu ineriartortitsinissamut suleqataanissamut akimmiffiunnginnissaannik qulakkeerissaaq.

Suliniuteqarnikkut sunniutai annikillisinneqassapput

Naalakkersuisut sanaartornermut aningaasartuutit qaffakkiartornerinut pakkersimaarinninniarlutik sanaartornerullu ingerlaannarnissaannut suliniutinik arlalinnik suliaqarput.

Tamanna ilaatigut pilersaarusiornermik pitsaanerusumik, najukkani entreprenørit nukittorsarneqarnissaat, sanariaatsinik nutaanik aamma atortunillu najukkaneersunik atuinerup annertunerulersinneqarnissaannik imaqarpoq. Tamatuma saniatigut akit qaffannerinut sillimaniarluni sanaartornermut missingersuutini isumalluutinik immikkoortitsisoqartarnissaa, aammalu periarfissaqarfiusuni akinut aalajangersimasunut isumaqatigiissusiortarnissaq misissorneqarpoq.

Ukiuni tulliuttuni sanaartornermut akit qaffakkiartuinnassasut, Naalakkersuisut naliliipput, nunanili tamalaani niuernikkut pissutsit nalinginnaaleriartussappata nalimmakkiartuaarnissaat naatsorsuutigineqarpoq.

Aamma ajornartorsiutit politikkikkut siunnerfimmut allannguutaanavianngitsut Aqqaluaq B. Egedep erseqqissaatigaa:

- Nunap ineriartornera ingerlatiinnassavarput, kisiannili tamanna isumatusaartumik, pitsaasumik aammalu aningaasaqarnikkut pissusiviusut inooqatigiinnermullu kingunerisassat isigalugit ingerlatissavarput, taanna allappoq.