Inissianut akit qaffakkiartortut: Kvadratmeterimut aki 1.000 koruuninik qaffattoq
Nunatsinni inissaqarniarneq ajornartorsiutaareerpoq.
Nunaqarfinni kinguaariit arlallit ataatsimut najugaqarajuttarput, Tasiilamilu innuttaasut 600-t missaanniittut utaqqisut allattorsimaffii takisuut pillugit iliuuseqartoqarnissaanik piumasaqarlutik aqqusinermi maajimi pisoqatigiipput.
Nuummi Iseritikkut inissiaataannut utaqqisut allattorsimaffianni inuit 2.000-ingajaat nalunaarsoqqapput. Sineriammi illoqarfinniit nunaqarfinniillu Nuummut nutsertut arlallit, inissaaleqinertik pissutigalugu utertariaqartarput.
Naalakkersuisullu inissianik sanaartornerup suli akisunerulersinnaanera aningaasaqarnermut nalunaarusiaminni maanna ilimasaarutigaat.
Kvadratmeterimummi akigititaq Namminersornerullutik Oqartussat sanaartortitassaanni 1.000 koruuninik qaffannissaa naatsorsuutigineqarpoq.
Pisiortorfiit sanaartugassanut akigititaasa qaffanneri, akit qaffannerinut ilaatigut peqqutaavoq.
Nunarsuarmi niuernermi akit allanngorneri annikitsunnguugaluarpataluunniit nunatsinnut annertuumik eqquisarnerat, sanaartornermut atortussat amerlanersaat nunatsinnut eqqussorneqartarlutillu ungasissumut assartorneqartarmata, nalunaarusiami allaaserineqarpoq.
Nunatsinni sanaartortitsisut suliassakinnerat, sanaartornermik suliaqartut siunnersuisartullu nalunaarutigigaat, nalunaarusiami aamma atuarneqarsinnaavoq
Tamannalu inissiat nutaat ikinnerulernissaannik sanaartornerullu iluani suliffissaaleqisut amerleriarsinnaanerinik kinguneqaratarsinnaanera, sanaartornermik suliaqartut ernummatigaat.
