Tasiilami inissianik utaqqineq sivisuvoq

Tasiilami inissarsinissamut utaqqineq sivisoorujussuuvoq.

Massakkut inuit 195-it inissarsiorput. Tamanna Iserit A/S kisitsisaani takuneqarsinnaavoq. Iserit A/S Tasiilami inissiat aquppai. 
Lasarus Mikaelsen, ukiuni arfineq-marlunni inissarsinissaminut utaqqivoq. Massakkut kollegiani najugaqarpoq.

Aggustip naanerani ilinniakkaminik naammassiguni inigisaminiit anisussaavoq.

Ilinniakkaminik naammassereeruni sumi angerlarsimaffeqassanersoq suli nalunarpoq.

– Erloqinalaarpoq, Tasiilami ineqarniarneq ajornakusoortorujussuuvoq, oqarpoq.

Tasiilami innuttaasut maajimi akerliussutsimik takutitsipput. Ilaatigut inissaaleqinerujussuup aaqqiivigineqarnissaa oqariartuutigineqarluni.
Tasiilami innuttaasut maajimi akerliussutsimik takutitsipput. Ilaatigut inissaaleqinerup aaqqiivigineqarnissaa oqariartuutigineqarsimavoq.

Sooruna utaqqisut taama amerlatigisut?

KNR-ip Iserit A/S aperaa sooq utaqqisut taama amerlatiginersut.

Allakkatigut ima akivoq:

– Soorunami Tasiilami najugallit tunumi amerlanersaagamik, tasiilami allatsissimasut amerlanerupput nunaqarfimmiit. Inoqarfiit illoqarfiillu amerlassusaat isigigaanni kisitsisit takussutaasarput qanoq amerlatigisartut.

Sulisunut inissiat

Tasiilami sulisunut inissianik amigaateqarnera annertoorujussuuvoq, taamaammat Lasarus Mikaelsen-ip Tasiilami najugaqarsinnaanini naluaa. Tasiilami sulisut inissiaannik pissarsisinnaanngippat, illoqarfimmut allamut nuuttariaqassaaq, ima oqaluttuarpoq.

– Tasiilami najugaqarusuppunga, kisianni inissaqanngikkuma, ernæringsassistentitut kitaanut suliffissarsiortariaqassaanga, Lasarus Mikaelsen oqarpoq, nangillunilu:

– Toqqissisimananngikkaluaqaaq kisianni allatut ajornaqaaq arlaannik ujaasisariaqassaanga periarfissamik.

Allannguineq eqqumiitsoq

Lasarus Mikaelsen oqaluttuarpoq, ukioq kingulleq Iserit A/S-imit paasitinneqarsimasoq inissiamut marlunnik initalimmik allattorsimaffimmi normu 21-mi inissisimasoq.

Maaji 19-anni ukioq manna qanoq inissisimanerluni apeqqutigaa. Maaji 21-anni Iserit A/S-imit nalunaarneqarpoq normu 307-nngorsimasoq.

Qanoq ililluni nummer 21-imit nummer 307-mut nuunneqarsimanini pillugu Lasarusip apeqqutigaa.

Iserit A/S-imit akineqarpoq inissiamut neqeroorfigineqarnermini 2023-mi novembarip 7-anni akissuteqarsimanngimmat allattorsimaffimmi inissisimanera unittikkallarneqarsimasoq.

Eqqumiiporli unitsikkallarneqarnerani utaqqisuni inissisimaffia allannguuteqarsimasussaanngitsoq, taamaattorli normu 21-mit 307-mut nuunneqarsimavoq.

Utaqqisuni suli peqataasuunini uppernarsimmagu, Lasarus normu 21-mut uteqqippoq.

KNR-ip paasiniarmagu qanoq ililluni allanngorsimanersoq, inunnut ataasiakkaanut tunngasut akissuteqarfigisinnaanagit, Iserit A/S akivoq.

Sermersuumi isumaqatigiissummi pingaarutilik

Inissaaleqineq sivisuumik ajornartorsiutaasimammat Kommunalbestyrelsip Kommuneqarfik Sermersuumi ilisimalluarpaat.

Inuit Ataqatigiit aamma Demokraatit akornanni Kommuuneqarfik Sermersuumi kommunalbestyrelsemi suleqatigiinnissamut isumaqatigiissutaanni inissaaaleqineq pillugu ima allaqqavoq, ”Maannakkorpiaq pisariaqartitsineq iliuuseqarfiginiarlugu allatut iliorluni aaqqiissutaasinnaasut misissorpagut, soorlu moduulikkaarilluni illuliat aamma containerini inissiat”.

Kommuneqarfik Sermersuumi Tasiilami inissaaleqisunut iliuuseqarnissamut qanoq pilersaaruteqarnersut borgmesterip tullersortaa, Justus Hansen attavigineqarpoq, allaaserinulli nalaani akinngilaq.

Lasarus inissiaqarsinnaanersoq imaluunniit nuunnissaa suli nalunarpoq.