Ullormut nalunaarut: Motoorimik unittoorneq SAR-ikkut annaassiniaanermik kinguneqartoq - Qaqortumilu aalakoortut eqqissiviilliortitsisut

Immami sapaammi unnukkut annaassiniartoqarpoq.

Tamanna  umiatsiaq motooriminik Nuup eqqaani unittoornerata kingorna pivoq, Kalaallit Nunaanni Politiini sillimasut pigaartut Aputsiaq Hansen taama oqaluttuarpoq.

Angallat Aasiaat Radioatigut attaveqarfigineqarpoq inuillu sisamat ilaasut politiinit aaneqarput.

- Imaq sikorasaarpoq, taamaattumik ilungersunarsinerunnginnerani aavagut, Aputsiaq Hansen oqaluttuarpoq.

Taassuma inuit sisamat ilaasut ajoqusersimanngitsut oqaluttuaraa.

Aammattaaq Nuummi politiit imigassartortumik Nuussuarmi  taxartitsisoqarnera pillugu sapaatiummat ullaakkut nalunaarfigineqarput.

Taxartartoq tamatuma kingorna unitsinneqarpoq, aaversinniassammallu politeeqarfiliaanneqarpoq.

- Imigassartorsimatilluni biileraanni imminut navianartorsiortiinnarani aammali allat navianartorsiortinneqartarput, Aputsiaq Hansen oqarpoq.

Qaqortumi imigassartorsimasut eqqissiviilliortitsisut

Kommune Kujallermi imigassaarniarneq imigassamillu sassaalliineq sapaatit-akunnerini kingullerni inerteqqutaavoq.

Taamaakkaluartoq inuit aalakoortut marluk Qaqortumi angerlarsimaffimmi eqqissiviilliortitsipput.

- Inuit taakkua marluk najukkami eqqissiviilliortitsisut ornippagut, sumiiffimminngaanniillu ingerlaqqullugit, Aputsiaq Hansen oqarpoq.

Naak Kommune Kujallermi imigassaarniarneq inerteqqutaagaluartoq imigassartorneq inerteqqutaanngilaq.

Kommune Kujallermi borgmesterip, Malene Vahl Rasmussenip (D), imigassamik tuniniaanerup qaqugu ammaqqinneqarnissaa naatsorsuutiginerlugu, suli oqaatiginngilaa.