Tasiilaq: Inuiaqatigiit inuussutissarsiorfitsik Islandimit annaagaangassuk
- Inuuniutigaarput. Taamaammat oktobarimiit juunip tungaanut immikkoornerulersarpugut.
Nunap immikkoortuani pisortaq, Hjørdis Viberg, Icelandairip ukiukkut Kulusummut timmisartuussisarnerujunnaarnerata qanoq kinguneqarumaarnera pillugu taama oqarpoq.
Taanna Tasiilami borgmesteritoqqap allaffiani ulluinnarni issiavoq. Tassanngaanniit Kommuneqarfik Sermersuup Tunumi (Kalaallit Nunaata kangia, aaqq.) malinnaasoraa.
Hjørdis Vibergip Tunup ukiukkut Islandimit avinngarusimatinneqarnerulernerata kinguneqarnissaa qularutiginngilaa.
- Siullertut, Islandimut toqqaannartumik timmisartuussisoqarsinnaanngimmat takornarialerisut ukiukkut takornariartitsisinnaajunnaarput. Pilersuinerup tungaatigut sulisussarsiornerullu tungaatigut aamma sunniuteqassaaq.
Hotel Angmassalimmi illoqarfiup kuuata illuatungaaniippoq akunnittarfiutilik imerniartarfiutilillu, Mike Nicolaisen. Taanna Sulisitsisut Peqatigiiffiata immikkoortortaqarfiani siulittaasuuvoq.
Namminersorlutik inuussutissarsiortut akornanni qanoq isumaqartoqarnersoq aperineqarami naatsumik ima akivoq:
- Isumalluartoqanngilaq. Atorunnaarsitsiartuaartoqarnera paasisimaneqarpoq. Imaappoq aningaasaliiunnaartoqarnera.
Tunu tassaavoq inui
Tunumi inuiaqatigiit ineriartorsinnaassappata Islandimit takornariat aningaasanik isertitsitaqarfiusariaqarput, Mike Nicolaisen oqaluttuarpoq.
- Umiartortarput sanalukkanillu pisisarlutik. Inuiaqatigiinnut iluaqutissartaqartorujussuuvoq. Erruisoq aningaasarsiussaaq. Pisiniarfiliaraangamik pisiniartitsisoq alla atorfinitsinneqarsinnaavoq. Suliassaqartitsillutillu illoqarfimmi uummaaritsitsisarput.
Tunup suna immikkorluinnaq ittoq ilisarnaatigaa, aamma sooq tassunga angalasariaqarpugut?
- Tamanna ajornanngitsuaraavoq. Inuttai pillugit, ilaa?
Mikep Tasiilaq igalaakkut qimerluujutigalugu qanini assaminik saamerlermik, assani assiliivimmut sammitillugu, asserpaa.
Qullini allarterniarlugit isini assaminik illuttut allarterpai.
- Killitsissutigineralaartarpara pissutigalugu inuit pineqaramik. Tunu pineqarpoq.
Islandimeersunimmi aningaasaliisinnaasunik takornariaqanngippat, Mike Nicolaisenip tamanna Tunup matujartuaarneqarneratut isigaa - tamaattoqarneralu nunaqavissunut siullertut kinguneqassaaq.
- Takornarianik aasaanerani angalaaqateqaraangama, takornariat kulturi aamma inunnik naapitsinissaq soqutigisarpaat. Nunaqavissutut sumiiffiit oqaluttuarissagikka, qilaatersornermik takutitsissasugut najugaqartunillu sammisaqaqatigiissasugut.
- Tamanna takornariat qujamasuutigaat.
Islandimiit ingerlaqqittarneq
Takornariarpassuit Tunumut pingaarnertut tikiuttannginnerat, Islandimulli angalanertik naggaserlugu orniguttarnerat Mike Nicolaisenip oqaluttuaraa.
- Islandiliarluni misigisassarsiornerup ilaattut tikinneqartarpugut.
Air Greenlandip Tunumut angallassisarnera siunissami ajornarnerulernissaa KNR-imit siornatigut allaaserineqareerpoq. Tamanna Islandimit pisisartoqarunnaarnerata kingunerisaanik Hotel Kulusuup ukiuunerani matoqanissaanik pissuteqarpoq.
Takornariat Nuummukaqqaarlutik Tunuliarsinnaanerat takornarialerup tungaatigut sullissineq tutsuiginarunnaarsippaa, Mike Nicolajsen oqarpoq.
- Nuuk Tunumut angalaniarnermi qitiutinniarsarineqarpoq (Island pinnagu, aaqq.). Tamatuma uagut sullissisutut tutsuiginarunnaarsippaatigut, Nuummiit tamaanga angalaneq ajornakusooqimmat.
- Taamaalilluta angalaneq naggaserlugu angalaffissatut siornatigornit suli inissisimalnerulerpugut.
Kitaani Nuuk angallanermi naapiffittut inissisimatinneqaleraangat tamanna kommunemit Hjørdis Vibergimiillu aamma maluginiarneqalersarpoq.
Angalanissamummi bilitsinut aningaasartuutit amerlisarput, pilersuinikinnerusoqalertarpoq sulisussarsiornissamullu periarfissakinnerulertoqartarpoq.
- Nuummukaqqaarluta angalaffiginiakkatta muminganik sammisumik timmisartoriarluta, mumeqqittarpugut. Taamaalioqqaartariaqarneq isumaqanngivippoq akisullunilu.
- Islandimut toqqaannartumik angalasinnaajunnaarnerput uagut sumiiffigisatsinnut ajorluinnarpoq.
