Spiralilersuisimaneq: Arnat kisimiinnatik ataatsimiititsinerni takusinnaagaat

Danmarkimi oqartussaqarfiup Patienterstatningip angalaqatigiivi arnanik akuerinngisaminnik 1960-imit 1991-imut naartunaveersaaserneqarsimasunut ilitsersuiniarlutik nunatsinni siullermeertumik angalanertik naammasseqqammerpaat.

- Sineriassorluta angalanitta arnanillu naapitsinitta sunniuteqarujussuarsimanera suliarlu arnanut pingaartupilussuusoq uppernarsivarput, Patienterstatningenimi immikkut siunnersorti Line Specht oqarpoq.

Patienterstatningen Danmarkimi oqartussaqarfiuvoq, nakorsiartut peqqinnissaqarfimmi passunneqartillutik ajoqusersimanerminnik nakorsaatinilluunniit allaanerusumik sunnerneqarsimatillutik taarsiiffigineqarsinnanerannik aalajangiisarfik.

Angalanerminni Uummannami, Aasianni, Qeqertarsuarmi, Qasigiannguani, Maniitsumi Nuummilu arnanik ataatsimiititsipput.

- Arnat angalasimanngitsuugutta attavigisimanngisassaraluagut oqaloqatigisimanngitsuugutsigillu ikiorsimanngitsuugutigillu ajunngitsorsiassanut qinnuteqarsimassanngikkaluartut attaveqarfiginissaat angalanitsinni pingaartupilussuuvoq, Line Specht oqarpoq.

Taassumalu oqarnera naapertorlugu, ataatsimiititsinermut peqataasuinnaanngitsut pissarsiaqarput.

- Arnat aaqqissuussamik, qinnuteqarnissamik qinnuteqarnissamullu periusermik nalunngisaminnut, ilaquttaminnut ikinngutiminnullu ataatsimiititsinitsinnut peqataareerlutik oqaluttuarsimanerannik paasitinneqarpugut. Ajunngitsorsiassanut aaqqissuussamut paasissutissat taamaasillutik siammarput, immikkut siunnersorti oqarpoq.

Arnat ajunngitsorsiassanik qinnuteqarsimasut oktobarip ulluisa 21-anni 973-iupput. Taakkunani 257-it akuerineqarsimapput, 704-t suliarineqaleruttorlutik aqqaneq-marlullu itigartinneqarsimallutik.

Arnat kisimiinnatik takugaat

Kisitsisilli pingaarnerpaajunngitsut, Line Specht oqarpoq.

- Qinnuteqartut amerlassusaat uagutsinnut pingaarnerpaanngilaq. Arnat kannguttaatsuliorfigineqarsimasut piumagunik ajunngitsorsiassanik qinnuteqarsinnaaniassagamik aaqqissuussamut ilisimasaqarnissaat uagutsinnut pingaarnerpaavoq.

- Arnat ilaat qinnuteqarusunngillat, qinnuteqarusukkunilli piareeqqasutullu misigisimagunik qinnuteqarsinnaallutik qanorlu qinnuteqassanerlutik ilisimassavaat, Patienterstatningimeersoq oqarpoq. 

Tassalu ajunngitsorsiassanut qinnuteqarnissamut ikiuinissaq, angalanermi pingaarnertut anguniarneqarpoq.

Arnalli aamma allatigut pissarsiaqartut, Line Specht nassuiaavoq. 

- Arnat kisimiinnatik misiginerat aamma pingaartinneqarpoq. Arnarpassuarnik namminneq misiginikuusap assinganik misigisaqarsimasut issiaqatigalugit ataatsimiinnerni misigaat, Line Specht oqarpoq.

Arnat ataatsimiititsinermi toqqissisimanissaat pingaartoq

KNR Nuummi ataatsimiititsinermi najuuppoq. Arnat 100-t pallillugit tassani peqataapput, ataatsimiiffiullu arnanut toqqissisimanartuunissaa aaqqissuisunit arlaleriarluni erseqqissarneqarpoq. 

Misigissutsimmi artornartut pineqartut, Line Spechtip erseqqissaatigaa.

- Arnani ukunani amerlasuut suneqarsimanerminnik oqaluttuarnikuunngisaannarput. Ataatsimiinnernut najuukkiartornerminni sapiisertariaqarsimagamik toqqissisimasinnaanissaat pingaartupilussuuvoq, Line Specht oqarpoq.

Ajunngitsorsiassanik qinnuteqartoqassatillugu qinnuteqarniartut susoqarsimaneranik allataqartussaasut ataatsimiititsinermi oqaluttuarineqarpoq.

Taamaammat tarnip pissusaanik immikkut ilisimasalik Tone Frank angalaqataavoq. Tarnikkut kingunerluutit utersaarsinnaasut taanna ataatsimiititsinermi nassuiaavoq.

Arnalli assigiinngitsumik qisuariartartut, nangilluni oqarpoq.

- Immaqa siullertut pingaaruteqarpoq oqaatigissallugu, qisuariaatsit assigiinngitsorujussuummata. Taakku uanga oqaloqatigisartakkakka, tassaanerupput misigissutsikkut qisuariaateqartut, Tone Frank oqarpoq.

Ilaasa qisuariarujussuassutigineq ajoraat Tone Frank nassuiaavoq. Pisimasulli sakkortuut pineqartillugit qisuariartoqarsinnaasarpoq.

- Timi pisumut utersaarsinnaasarpoq, pisumut eqqaasinneqaraangatta. Arlaannik tusaasaqaraangatta, naamasaqaraangatta imaluunniit killissamik qaangiiffigiterujussuarnermut pisimasumut sakkortusimasumut eqqaanartumik takusaqaraangatta. Taava imannak misiginarluni pisumut utersaarluni, imaluunniit massakkut pisutut misiginarluni, Tone Frank oqarpoq.

Misigissutsit assigiinngitsorpassuit qinnuteqarnermi utersaarsinnaasut taassuma ataatsimiititsinermi oqaluttuaraa. Ilaatigut kanngusunneq, aliasunneq, matoqqaneq kamannerlu.

Kisimiittutullu misigisimasorpassuusut angalaqatigiinnit oqaatigineqarpoq.

Tarnikkut timikkullu kingunerluutit 

KNR-illu arnat oqaloqatigisaasa marluk misigissutsit tarnip pissusaata ilisimasallip taagugai arlallit ilisarisinnaavaat.

Arnaq KNR-ip oqaloqatigisaa siulleq 16-inik ukioqarluni nammineq ilisimanagu spiralilerneqarsimalluni oqaluttuarpoq.

Taamaattoqarnera nammineq ilisimasimanagu ukiullu arlallit qaangiuttut uffarnermini ippigisaqarluni nusullugu peersimallugu taanna oqaluttuarpoq.

Aamma taanna kisimiittutut misigisarsimavoq.

Kingunerluutit tarnip pissusaanik ilisimasalimmit oqaluttuarineqartut tamaasa ilisarisinnaallugit, taanna oqaluttuarpoq.

- Soorlu illit ornikkumma, eqqarsarsinnaavunga, spiraleqarsimasunga nalunngikkit. Taava qimaassaanga, taanna oqaluttuarpoq.

Inuunermilu annersaani kingunerluutit atugarigamigit nalinginnaasumik misigissusiusorisimallugit taanna oqaluttuarpoq.

Aamma arnaq alla kisimiittutut misigisimalluni oqaluttuarpoq.

Taassuma aamma kanngusuttarsimalluni oqaluttuaraa. Aamma matoqqaneq. Soorlu qatanngutaa apeqquteqaraangat allamut saasaaripallattarsimalluni, taanna oqaluttuarpoq.

Meeraanerminilu pisimanera sivisuumik nipangiussisimanermut pissutaaqataasinnaavoq.

- Ukiukitsuulluni imminut tatiginannginnami nakorsamulluunniit oqaluttuarisinnaasimanngilara, taanna oqaluttuarpoq.

Aamma taamanikkut naartunaveersaaserneqarnermini pissutsit allaanerusut taassuma erseqqissaatigaa. Kinguaassiuutinut tunngasut taamani paquminarnerusut, taanna oqaluttuarpoq. Taamaammat oqaluuserinissaa ajornakusoorsimavoq.

Naartunaveersaaserneqarnera tarnikkuunnaanngitsoq ajoqusiisimasoq taanna oqarpoq.

- Ataatsimik meeraqarpunga. Kisianni sunaaffa imaassinnaasoq arlaliusussaagaluartut, taanna oqarniaraluarpoq, oqaatsinili suli naanagit qissaserluni.

Maanna ajunngitsorsiassaqarsinnaanissaq pingaartoq, arnap KNR-ip oqaloqatigisaata siulliup oqaluttuaraa.

Aningaasalli pingaarnerpaanngitsut, taanna oqarpoq. Akuerineqartutut misigisimanissaq pisimasorlu akuerineqarsiinnaanngitsoq nassuerutigineqartoq, taassuma pingaartippai.

Kisianni aamma aningaasat pingaartuusut, nangilluni oqarpoq. Taassuma oqarnera naapertorlugu, tarnikkut ikiorneqartarnissamut maanna neqeroorutit naammanngillat. Arlaqanngitsunik oqaloqateqarnissamik periarfissinneqartartut, aningaasallu sivisunermik ikiorneqarsinnaanissaq qulakkiissagaat, taanna oqarpoq. 

- Tarnip pissusaanik ataavartumik oqaloqateqarsinnaanissamut periarfissiissapput, taanna oqarpoq.

Oqaloqateqarnissamik pisariaqartitsisut Tusaanngamut ulloq unnuarlu 80 11 80-mut saaffiginnissinnaapput 1899-mulluunniit SMS-erserlutik.

Patienterstatningenip Tunumi, Kitaani Kujataanilu aappaagu upernaakkut marloriarluni angalatitaqaqqinniarluni pilersaarutigaa.