Angalaqatigiit immikkut ilisimasallit nunatsinni angalanissaat spiralilersuinermi eqqugaasimasut oqaaseqartartuata nuannaarutigaa
Spiralilersorneqartut danskit naalagaaffiannit taarsiffigitinnissamut qinnuteqarnissaannut angalaqatigiit immikkut ilisimasallit atorfissaqartinneqaqaat. Taakkua nunatsinni sumiiffinnut assigiinngitsunut ukiaru angalassapput.
Naja Lyberth akuersiteqqaarnagu naartunaveersaammik spiralilerneqarsimasoq taama oqaluttuarpoq. Naja Lyberth arnat akuersiteqqaarnagit spiralersorneqarsimasunut oqaaseqartartuuvoq
- Arnarpassuit utoqqasaat atortorissaarutit digitaliseringit ilitsoqqussarinnginnamikkit, taamaattumik angalaqatigiit immikkut ilisimasallit arnanut ornigullutik ikiuukkiartorlutik, immersuinissaannik ikiuiartornissaat iluaqutissartalerujussuuvoq, pisariaqartitsigunillu tarnip pissusianik ilisimasalimmit, kalaallisut oqaaseqartumit tarnikkut ikiorneqarneqarsinnaallutik, Naja Lyberth oqarpoq.
Angalaqatigiit immikkut ilisimasallit arnat spiralilersorneqarsimasut taarsiiffigitinnissamut qinnuteqarnissaannut ikiorniarlugit nunatsinni ukiaru angalassapput.
Danmarkimi napparsimasut taarsiiffigitinnissaannik suliaqartarfik Patientforeningen DR-imut taama paasissutissiivoq.
DR-ip paasissutissiissutai naapertorlugit, angalaqatigiit tassaassapput inatsisileritooq, peqqissaasoq, tarnip pissusianik ilisimasalik kalaaleq, nutserisoq kiisalu eqqartuussisoq soraarneq.
Nunamut Namminermut Peqqissutsimullu ministereqarfiup arnat 4.500-t taarsiiffigitinnissaminnut pisinnaatitaaffeqartut siusinnerusukkut nalunaarutigaa.
Taarsiiffigitinnissaminnut pisinnaatitaaffeqartut tassaapput, akuersitinneqaqqaaratik naartunaveersaammik spiralilersorneqartut aamma naartunaveersaammik kapuummik Depo Proveramik kapitissimasut.
Nunatsinni sumiiffinni assigiinngitsuni ikiunissaq
Naja Lyberth spiralilersorneqarsimasut pillugit suliami, suleqatigiinni namminneq piumassutsiminnik suliaqartuni siuttuuvoq, taanna arnat spiralilersorneqarsimasut eqqartuussissuserisuannut, Mads Prammingemut Pramming Advokatineersumut ilaatigut attaveqartartuuvoq.
Arnat akuersiteqqaarnagit naartunaveersaammik spiralilersorneqartut 142-t danskit naalagaaffiannit inuit pisinnaatitaaffiinik unioqqutitsisoqarnera pissutigalugu taarsiffigitinnissaminnik 2023-mi piumasaqarput.
Naja Lyberthip oqarnera naapertorlugu suleqatigiit namminneq piumassutsiminnik suliaqartut eqqartuussissuserisortik peqatigalugu arnanut taarsiiffigitinnissamut qinnuteqarniartunut ikiuillutillu siunnersuipput.
Naja Lyberthip oqarnera naapertorlugu arnat naalagaaffimmut suliassanngortitsisut taarsiffigitinnissaminnut neriorsorneqareersut, taarsiiffigitinnissaminnut qinnuteqassanngillat.
Arnat taarsiiffigitinnissaminnut suliassanngortitsisimanngitsut angalaqatigiinnit immikkut ilisimasalinnit taamaattumik ikiorneqassapput.
Naja Lyberthip angalaqatigiit immikkut ilisimasallit nunatsinni angalanerminni najuullutik siunnersuinissaat qilanaaraa.
- Spiralilersorneqarsimasut sumi tamaani assigiinngitsuni najugaqartiterput, nunaqarfinni illoqarfinni avinngarusimasunilu najugaqarput, aquttuusugut ikiuunniarnikuuvugut, nassuiaruminaannikuuvoq, taarsiiffigitinnissamut immersugassaq qanoq immersussagaat, taamaattumik oqilisaataasorujussuussaaq, arnanut pineqartunut ornigulluni ikiuukkiartortoqarpat, immersueqateqarsinnaallutik, Naja Lyberth taama nassuiaavoq.
DR-imit allaaserineqartoq naapertorlugu angalaqatigiit immikkut ilisimasallit angalanissaat naalagaaffimmit aaqqissorneqarpoq.
Naja Lyberthip naalagaaffiup akissussaaffimmik tigusinera nuannaarutigineqarpoq.
- Iluarivara ikiuukkiartornissaat, immersuinissamut, uagut aqutsisuunikuusugut tamanna suliassarinngilarput, taanna naalagaaffiup suliassaraa, aap isumalluarnarpoq, spiralilersorneqarsimasut oqaaseqartartuat, tarnip pissusianik ilisimasalittut aamma ilinniarsimasoq Naja Lyberth KNR-imut oqarpoq.
