Naalakkersuisut spiralilersuisimaneq pillugu nalunaarusiaat kinguaattooqqittoq
Naqqiut: Allaaserisaq juunip ulluisa pingajuanni nalunaaqutaq 8.30 nutarterneqarpoq. Spiralimik nalunaarusiaq peqqinnissaqarfiup oqartussaaffittut nunatsinnit 1992-imi tiguneqarnerata kingorna pisimasunut tunngassuteqartoq, allaqqagaluarpoq. Tamanna eqqunngilaq. Nammineq piumassuseq aallaaviginagu naartunaveersaasersuineq 1960-imiilli ulloq manna tikillugu nalunaarusiami pineqarpoq, nalunaarusiaq piffissaliinerup tungaatigut killiligaannginnami. KNR-ip kukkuneq ajuusaarutigaa.
Spiralilersuisimaneq pillugu nalunaarusiaq, peqqinnissaqarfiup 1992-imi
oqartussaaffigineqalernerata kingorna suliat pillugit suli kinguaattoortoq, Naalakkersuisut tusagassiuutinut nalunaarummi tallimanngornermi paasissutissiipput.
Nalunaarusiaq februaarimi naammassineqarpoq, naalakkersuisulli kingorna aalajangerput, suli suliassartaqarmat suliarineqaqqittariaqartoq.
Naalakkersuisut naatsorsuutigisimagaluarpaat nutserinissamut piffissaliunneqartoq, suliassamullu aamma piffissaliunneqartoq naammassasoq, taamaaqqajanngilarli. Taakku pissutaallutik tunniussinissamut ilaatigut kinguartitsisoqarpoq
Spiralilersuisimaneq pillugu nalunaarusiamik suliaqartut nalunaarusiami inerniliineq pillugu isumaqatigiinngitsut marsimi saqqummiunneqarpoq.
Taamaattumik suliaqartut aalajangerput marlunnut avissallutik, tamarmillu immikkut naliliissallutik.
Inatsisit atuutsinneqarnerannut naalakkersuisuusimasoq, Naaja Nathanielsen (IA) nalunaarusiortut suliaannut nalilersuisinnaasunik, arlaannaannulluunniit
attuumassuteqanngitsumik tamatuma kingorna aallartitsivoq.
Tassani immikkut ilisimasallit arlaannaannulluunniit attuumassuteqanngitsut
spiralilersuisimaneq pillugu nalunaarusiamik suliaqartut inerniliussaannut naliliissallutik.
Naalakkersuisut ugguarput
Suliami nutsigassanngortitsineq aamma ilisimatuut akornanni nalilersuinermut ingerlatsineq ataatsikkut ingerlanneqassasut, Naalakkersuisut tusagassiuutinut nalunaarummi allapput.
Meeqqanut, Inuusuttunut, Inatsisit Atuutsinneqarnerannut Naligiissitaanermullu
Naalakkersuisoq, Mariane Paviasen Jensen (IA) ima allappoq:
- Nalunaarutit tamanut saqqummiunneqarnissaat kinguarteqqittariaqarneri Naalakkersuisut ajuusaarutigisorujussuuaat, kisiannili suliap iluamik suliarineqarnissaanut, pitsaassutsimillu qulakkeerinnereernerup kingorna suliassamut piffissaq annertunerusoq pisariaqartinneqartoq nalilerparput.
Naalaakkersuisut naatsorsuutigaat nalunaarusiat aggustip naalernerani tamanut aatsaat saqqummiunneqarsinnaassasut.
