Ilinniartunut ineqarfiit pillugit malittarisassat Ilisimatusarfiup ilinniartuminik ukiut tamaasa annaasaqartarneranut peqqutaasut
Aappariit inuusuttut Laila aamma Steve Pedersen Hinrup ilinniartut ineqarfiini inissaqannginnertik peqqutigalugu nunarput qimallugu aallartut KNR-imit oqaluttuaraarput.
Taakkumi taama aqqusaagaqartuni siulliunngillat, Ilisimatusarfimmimi tamanna ajornartorsiut aamma ilisimaarigitsik, ilinniartunut sullissivimmi pisortaq Rosa Lynge Lorentzen oqaluttuarpoq.
- Ukiut taakku marluk iluanni Nuup avataani Nuummilu najugaqarsimagaanni Ilinniartut taakku akornaniilertaramik taamaalillutik Iseritsimiissinnanngillat KAF-imiissinnaanatillu. Aamma ataasiaannarnata ilinniartut tassaniittut naammattoortarpagut, Rosa Lynge Lorentzen oqarpoq.
Laila aamma Steve Pedersen Hinrup pisumi tassanerpiaq inissipput, taamaalillutik ilinniartut ineqarfiini ineqalernissaminnut Iseritsimut KAF-imullu qinnuteqarsinnaanatik
Ukiut tamaasa inissaaleqisoqartoq
Ilisimatusarfimmi ilinnialertussat ilinniartut ineqarfiini inissaqannginnertik peqqutigalugu unitsitsiinnartartut ukiut tamaasa nalaanneqartartoq, Rosa Lynge Lorentzen oqaluttuarpoq.
Ilinniakkamillu unitsitsiinnartartut ikinnerpaaffissaaniitinniarlugit immikkut ilinniarnerup aaqqissuussaaneranik allanngortitsillutik ilinniartunut sullissivimmit ikiuussinnaasarput.
- Ilaatigut nalaataqartarpugut taamatut immikkut tulluarsakkanik ilinniarnerisa aaqqissuunneqarnikuuneranik ima utaqqitigisunik angummanniarnerminni angummassinnaajunnaarlutik taamaalillutik aallartinnissaraluartik unitsiinnartariaqartarlugu, taanna oqarpoq.
Laila Pedersen Hinrup tusagassiortutut ilinniarpoq immikkullu tulluarsakkamik ilinniarnerata aaqqissussaanera allanngortinneqarpoq, taamaalilluni onlinekkut februaarip tungaanut ilinniarluni taassumali kingorna susoqarumaarnersoq ilisimanngilaa.
Ilinnialertussanut kalluaasartoq
Lailap Stevellu pisoq aqqusaagaat aamma ilinniartunit arlalinnit aqqusaarneqartarpoq, ataasiaannarnatillu aamma Ilisimatusarfimmi ilinniartunut sullissivimmit ikiuuttarput.
Ilinniartullu ilinnialernissamut akuerisaasut ilinniartut ineqarfiini ineqalersinnaannginnertik peqqutigalugu ilinnialernissaminnik unitsitsisariaqaraangata, tamanna ilinniartut aallartittussat amerlassusiannik annikillisaasartoq, Rosa Lynge Lorentzen nassuiaavoq. Tamannalu ajornartorsiutaavoq.
Ilinnialernissarlu qulakkeerniaraanni ilinniartut ineqarfiinut piaartumik qinnuteqartarnissap eqqumaffigineqarnissaa Rosa Lynge Lorentzenip innersuussutigaa.
- Kingusinaarluni qinnuteqarsimagaanni kollegiat ulikkaapallattarmata, qinnuteqalernermi kollegianut piaarnerpaamik qinnuteqapallannissaq eqqumaffissatut taarusussinnaavara, taanna oqarpoq.
Meeqqanut, Inuusuttunut , Ilinniartitaanermut, Kultureqarnermut, Timersornermut Ilaqutareeqarnermullu Naalakkersuisup Aqqaluaq B. Egedep Ilinniartut ineqarfii pillugit inatsisartut inatsisaat allanngortinniarneraa pillugu KNR-ip apersorniaraluarpaa sulili akissutissarsinata.
