Aappariit inuusuttut ilinniartut ineqarfiini inissaqannginnertik pissutigalugu aallartut

Laila Pedersen Hinrup uinilu ilinnialerniarlutik ilinniartut ineqarfiini inissarsisinnaannginnertik pissutigalugu nunarput qimallugu aallarput.

Allattoq Paarnannguaq Nielsen

decembarip 30-at 2024 07:30

Aappariit inuusuttut Laila Pedersen Hinrup aamma Steve Pedersen Hinrup, Nuummi ilinniartut ineqarfiini inimik tunineqarsinnaannginnertik pissutigalugu nunarput qimallugu aallartariaqalerput.

- Soorunalimi pikkunarpoq, Laila Pedersen Hinrup oqarpoq nangillunilu:

- Siullermik manna ineeraq qimattariaqalernikuuarput, ilinniartutut allatut ineqarsinnaannginnatta, ilinniarnermusiallu inimut akiliutigisartakkatsinnut naammannatik. Taamaammat aalajangernikuuvugut nunarput qimassallugu, taanna oqarpoq.

Laila Pedersen Hinrupip uia Steve Pedersen Hinrup ilinniartitsisutut Nuummi ukiuni sisamani ilinniareerluni siorna aasaagaa naammassivoq, taamaalillutik aappariit inuusuttut Ilulissanut nuupput.

Nuannaarneq sivikitsoq

Ilulissani qaammatit arfinillit najugaqareerlutik tusagassiortutut Ilisimatusarfimmi ilinnialernissamut qinnuteqaatini akuerineqarpoq. Taamaalillutik Ilinniartut Ineqarfiisa Allaffeqarfiat (KAF) aqqutigalugu ilinniartut inaanni ineqalernissaminnut qinnuteqarlutik Laila oqaluttuarpoq.

Nuummilu ilinniartut inaanni ineqalernissamut qinnuteqaataat akuerineqarmat aappariit pisattatik poortoriarlugit Nuummut uterput. Pilersaarutillu tamarmik piviusunngunngitsut, Laila oqaluttuarpoq.

- Uima suliffia aqqutigalugu inimik neqeroorfigitippugut, kisianni tamatta ilinnialertussaagatta taanna itigartitsissutigaarput, Laila Pedersen Hinrup oqarpoq.

Ilinniartummi ineqarfiini ineqalernissaat atorunnaarsinneqarpoq.

KAF-imi aqqutigalugu ilinniartut inaanni ineqalissagaanni Nuup avataani ukiuni marlunni amerlanerniluunniit najugaqarsimanissaq malittarisassani allaqqavoq. Marluullutillu taanna malittarisassaq naammassisimanngilaat tassami nunatsinni illoqarfiit pingaarnersaannut utinnginnerminni Ilulissani qaammatit arfinillit najugaqarput.

Ilinniartut ineqarfii pillugit inatsisartut inatsisaat

§ 1. Inatsisartut inatsisaat maanna atortinneqassaaq attartortitsigallarnernut, ilinniartut ineqarfiinik, Namminersorlutik Oqartussani atugassiissutigineqartunik tamatumunnga qinnuteqarnermik tunngaveqartumik, ilinniartunut allaneersunut ineqarnissamik pisariaqartitsisunut, ilinniagaqarnerminnut atatillugu, taamaattoq tak. imm. 3.

Imm. 2. Taaguutigineqartumi ilinniartut allaneersut paasineqassaaq ilinniagaqartut minnerpaamik ilinniakkamik aallartitsinnginnermi ukiuni 2-ni illoqarfiup ilinniagaqarfiusussap avataani inuit allattorsimaffianni nalunaarsorneqarsimasut.

Imm. 3. Naalakkersuisut pisuni immikkut ittuni, tamatumanilu minnerunngitsumik pissutsini inunnik ikiorsiinissamut attuumassutilinni, inissaqartitsiniarnerup tamanna ajornartinngippagu, ilinniartunut avataaniit aggersuunngitsunut, ilinniartunut inissamik piffissami killilikkami ineqartitsisinnaapput.

Aallerfik: Ilinniartut ineqarfii pillugit Inatsisartut inatsisaat

Allisiguk

- Taava Iserit A/S-imut qinnuteqarpugut siullermik aperaluta kisianni aamma sunaaffa ukiut marluk Nuummi najugaqaqqaarlutik iseritsimut qinnuteqartoqarsinnaasoq ilinniartut inaataanik, taanna oqarpoq.

Illuutileqatigiiffimmut kommunip pigisaanut ilinniartut ineqarfiinut qinnuteqassagaanni Nuummi ukiuni marlunni amerlanerniluunniit najugaqarsimanissaq malittarisassaasoq Kommuneqarfik Sermersuup nittartagaani allaqqavoq.

Ilinniarnissamik unitsitsisariaqalerneq

Taamaalillutik aappariit inuusuttut ilinniartut inaataanni ineqarsinnaajunnaarput, tassami Nuup avataani Nuummilu ilinniartut inaataanni najugaqarnissamut malittarisassat naammassisimanngimmatikkit itigartitsissutigineqarpoq.

Marluullutillu ilinniassanerlutik nalornisigisalerpaat.

- Ilinniarnissagut apeqquseqattaareerlugit arlarput unittariaqalernikuuvoq.

- Nalunnginnatsigu attatorfissarsigutta inimut akiliut qanoq akeqassanersoq taamaalilluni uimma ilinnialernissani unitsittariaqalernikuuaa, Laila Pedersen Hinrup oqarpoq.

Laila Pedersen Hinrup maanna Ilisimatusarfimmi tusagassiortunngorniarluni ilinniarpoq, nunarpullu qimallugu aallartussanngorami onlinekkut februaarip tungaanut ilinniartussanngorpoq. Taassumali kingorna qanoq pisoqarumaarnersoq suli ilisimanangu.

Inatsit allanngussanngitsoq

Lailap uinilu Ilinniartut Ineqarfisa Allaffeqarfiat aamma Iserit A/S aqqutigalugit inimik tunineqarsinnaannginnamik akisussaasumut tassa Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisumut Aqqaluaq B. Egedemut allagaqaateqarput.

Aappariillu inuusuttut ilinniartut ineqarfiini sooq inimik tunineqarsinnaannginnertik oqaluttuaraat, naalakkersuisumilli ikiorneqarsinnaanngillat.

Allagaatinilu KNR-ip takunniffigisinnaasaani Naalakkersuisoq Aqqaluaq B. Egede ima akissuteqarpoq:

- Ilungersunartumik inissisimanersi pillugu Naalakkersuisut paasinnipput, taamaattorli ilinniartut ineqarfii pillugit inatsimmi qinnuteqarsinnaatitaasut pillugit maanna allannguuteqarnissamut Naalakkersuisut pilersaaruteqanngillat, Aqqaluaq B. Egede allappoq.

Ilinniartut ineqarfiinut tunngatillugu ilinnialertussat avataaneersut Nuummilu najugallit immikkoortinneqarnerannut kommunip Namminersorlutik Oqartussanit immikkoornera ilinniartut ineqarfii pillugit inatsit allanngortinneqassannginneranut Aqqaluaq B. Egedep aamma tunngavilersuutigaa.

Aallareersimalertut

Aappariit inuusuttut ilinniartut ineqarfiini najugaqalernissartik sukataarutigisareeraluarlugu, nunarput qimallugu maanna aallareersimalerput. Laila Pedersen Hinrupillu siunissami ilinniartut inissaqartinneqarniarneratigut naligiimmik pineqartarnissaat kissaatigaa.

- Kissaatigersuaarpara ilinniartut allat siunissami naligiimmik pineqartassasut, imannak atugaqartitaaneq ukualu inatsit tunngavigalugit ilinniartuniit allaniit allatorluinnaq pineqarneq, sakkortuvoq, Laila Pedersen Hinrup oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.