Maria Grødem functional fitnessimi VM-imi bronzennappoq
Maria Grødem Nuummeersoq Australiamiit angerlamut angalavoq VM-imiit bronzemik ujameqarluni.
Ujamik pissarsiaraa timersuummi functional fitnessimi nunarsuarmi pissartanngorniunneq Brisbanemi pimmat. Tassani unammeqataasut unammeriaatsit arfinillit ulluni pingasuni naammassivaat.
Taakku tamarmik assigiissutigaat pinertuneq, nukittussuseq oqimaassuserlu najoqqutaralu eqarsaallaqqinnermi unammissutaagamik.
Functional fitnessimi nunarsuarmi pissartanngorniunneq Australiami Brisbanemi silami unamminikkut ingerlanneqarpoq.
Maria Grødemip unammeqataasalu aallaqqaammut takujuminaatsippaat qanoq inissisimanerlutik unamminerit sapaatip akunnera kingulleq tallimanngornermiit sapaat ilanngullugu ingerlanneqarmata.
- Angusat allattorsimaffiat aaqqissuisut ajornartorsiutigaat taamaattumik aatsaat sapaammi takusinnalerparput inissinnertigut sumiinnerput, Maria Grødem KNR-imut oqaluttuarpoq.
Ujamik qulakkeerpaa
Kiisami angusat allassimaffiat malinnaasitsilerpoq. Tassanilu takuneqarsinnaalerpoq arnat nukittuut nunanit tamalaaneersut akornanni Maria Grødem inissisimalluartoq.
- Assut tupaallaatigisannik inissinnernik marlunnik qaffariarsimagama sisamaanniit aappaannut qaffariarlunga. Taamaasippat ujaminnannissannik qulakkeerisutut misigivunga. Uanniit sisamaattut inissikkallartup tungaanut pointigut assigiinngissut annertujaarpoq tamannalu eqqissiallaatigeqaara, Maria Grødem oqarpoq.
Unamminerit naammassimmata allanngortoqalaarpoq. Maria Grødem pingajuattut inissikkami VM-imi bronzennappoq.
Nunarsuup illuatungaanut unammiartornissaq sioqqullugu anguniagaqarluni sungiusarnerup tamanna kinguneraa.
- Tamaasa pikkoriffiginiaraanni piffissartungaatsiartariaqarpoq. Oqareernittut unammeriaatsit arfinillit aqqusaarneqarput. Qaammatit pingasut sisamat kingulliit assut sungiusarpunga ullormut marloriarlunga nalunaaquttap akunneri marluk tamatigut sungiusartarpunga, Maria Grødem oqaluttuarpoq.
Functional fitnessimi VM-imi angusarissaareerluni ukioqatigiinni 45-niit 49-nut ukiulinni nunarsuarmi kakkannerpaanut unammilleqqinnissamut Maria Grødem piumassuseqarluarpoq.
- Suli ingerlaqqikkusuppunga. Maanna ukioqqortussutsini 45-niit 49-nik ukiulinnut killippunga sulilu taakkunani unammillertit Tysklandimiit Sverigemiillu sakkortoorujussuupput. Tassa ukioqqortusigaluarluni unammillerneq suli sakkortuvoq. Taamaattumik suli ingerlaqqikkusuppunga, Maria Grødem oqarpoq.
