Maria Grødem Functional Fitnessimi nunarsuarmi pissartanngorniunnermi sølvinnattoq
Maria Grødem pissartanngorniunnerni peqataareernikuuvoq.
Taanna crossfitimi aamma funchional fitnessimi nunarsuarmi pissanngortanngorniuunnerni arlalinni peqataanikuuvoq. Australiami functional fitnessimi nunarsuarmi siorna pissanngortanngorniuuttoqarnerani bronzennappoq.
Maria Grødemili Nuummi najugaqartoq tamatumuuna – Arubami functional fitnessimi nunarsuarmi pissanngorniuunnermit sølvimik angerlaassivoq.
- Oqiliallaatigeqaara, Maria Grødem KNR-imut sapaatiummat unamminerup kingorna oqarpoq.
Functional fitness timersuutaavoq assigiinngitsunik arfinilinnik unammiffilik, taakkunani timersortartut timikkut piginnaaneqarneqqusaattarput.
Unamminerni tamani sungiusaatit assigiinngillat. Suut sungiusaataassanersut nalinginnaasumik sapaatip akunnera ataatsip marlulluunniit sioqqullugit aatsaat ilisimatitsissutigineqartarput. Taamaattumik timersortartut angusarissaassappata timersuutini taakkunani tamani pikkoriffeqartariaqarput.
- Assersuutigalugu qasujaakkaanni, nukittunanilu qasujaannermi angusaqaraluaruit nukittussutsimili appasissumik angusaqaruit, ajugaasut akornanni inissinnissannut ajornarnerussaaq. Taamaammat assigiinngitsunik tamanik pikkoriffeqarnissaq pingaarpoq, Maria Grødem oqarpoq.
Peqataasut oqimaatsunik kivittaarinerit, timimik sungiusanerit soorlu burbees assannillu ingerlanermik ilaatigut unammissuteqartarput.
Kiannera
Maria Grødemip angusani – pingaartumik taama kiatsigisumi unamminertik eqqarsaatigaanni tupaallaatigalugu oqaatigaa.
Caribiap kujasissortaani Arubami unammiffiusumi 29-t 34-llu akornanni kiatsigivoq.
Maria Grødemip taama kiatsigisumi timersornissani sungiusimannginnamiuk, timikkut tarnikkullu ilungersorsimalluni oqaatigaa.
- Timiga oqimaatsutut qasoqqasutullu misinnarpoq, taamaattumik arriinneruvunga. Tamanna eqqarsartaatsikkut uippakajaarnarpoq, nunatsinnimi timiga taama sulisanngimmat.
Maria Grødemip nunatsinni taama timersortartut amerliartoraluartut inuusuttut amerlanerusut functional fitnessimik soqutiginnilersinnaanissaat neriuutigaa.
Taamaalillutik nunani allani unammisartunut peqataasinnaasut amerlanerulersinnaapput, timersuullu ilisimaneqarnerulissalluni.
Timersuummi taanna nutaanik ilikkagassaqarfiujuartarpoq.
- Timersuut nuannerluinnarpoq assigiinngitsorpassuarnillu imaqarluni. Pitsaanerulernissaq periarfissaajuaannarpoq, sungiusaataasartullu assigiiaanngisaannarlutik, Maria Grødem oqarpoq.
Maria Grødemip unammiarnerit peqataaffigisartagai nunatsinnit ungasissumiittarput. Taamaammat taassuma unammiartornissaanut aningaasaliisut qujaffigai.
- Tamatta nalunngilarput Kalaallit Nunaanniit angalanissaq akisusinnaasoq. Taamaattumik suliffeqarfiit najukkameersut timersuut pillugu tapersersuisinnaasut, uannullu ikiuukkusuttut, qujamasuutigeqaakka.
Maria Grødem unammersuarami 516-inik pointinnappoq, sisamassaanillu nunarsuarmi pissartanngorniunnermut peqataalluni.
Nukkassanermik nunarsuarmi pissartanngortuuvoq Sverigemeersoq Susanne Hedberg 560-inik pointeqarluni.
