Nukittooq Maria Grødem VM-riassaaq
Maria Grødem funktionel fitnessimi Danmarkimi pisartanngorpoq unamminerit sapaatip akunnerani DM-rfiusumi Aalborgimi pimmata.
Maria Grødem ukioqatigiinni 45-niit 49-nut ukiulinni peqataagami kultinnappoq.
- Danmarkimi pissartanngornera imatut isumaqarpoq funktionel fitnessimi Australiami Brisbanemi VM-rtoqarnissaanut qaaqqusaassagama, tamannalu novemberip 20-ata missaani pisussaavoq, Maria Grødem oqarpoq.
Sapaatit akunnerisa marluk matuma siorna aamma Europami pissartanngorniuttuni Hollandimi peqataavoq ukioqatimini tullersortaasutut inissilluni.
Funktionel fitnessip aallartiffigaa tamaviaarluni timersuut crossfit. Taamaattoq funktionel fitness eqaarsaarnertaqarpoq tamannalu crossfitimi atugaanngilaq. Funktionel fitness maanna OL-mi unammissutaasalereerpoq.
Pitsaassuseq qaffasippoq
Maria Grødem VM-mut ilimasuuteqarpallaarnaversaarpoq naak Europami pissartanngorniuttuni tullersortaasutut inissikkaluarluni.
- Pitsaassuseq qaffasissorujussuuvoq aamma ilimagaara siornarniit suli qaffasinnerussasoq, Maria Grødem novemberimi VM-rnissani pillugu oqarpoq.
- Unamminerit amerlasuut funktionel fitnessimi aamma crossfitimi peqataaffigisareerpakka. Maanna takuneqarsinnaalerpoq siornatigut crossfittertartut funktionel fitnessimut nuuttalersut. Taamaattumik takusinnaareerpara unammineq sakkortussaqisoq, Maria Grødem oqarpoq.
Sinnattup piviusoq assiginagu
Maanna suli qaammatit tallimat Australiami VM-rtoqarnissaanut ingerlassapput sungiusarnermilu pingaarnersiugassat inississulereerput.
- Tamanna uannut maanna iluaqutaaginnarpoq pisarnittut maanna nukittutiginninnama nukineqqinniarnerlu sivisusinnaalluni. Qujanartumik maanna qaammatinik tallimanik piffissaqarpunga nukittunerulerlungalu pinertunerulerniarnissannut soorunami aamma qasujaalluartariaqarpunga, Maria Grødem oqarpoq.
Sinnattut piviusorlu assigiittuaannanngillat. Aamma VM-mi peqataasussat kakkassaqimmata imaarataannaavoq piviusoq sinnattuniit allaanerusoq. Ilimasuutit nalorninarnerannut aamma pissutaavoq peqataasussat allassimaffiat suli immersorneqarmat.
- Sinnattorisinnaavara pikkorinnerit pingasut akornanniinnissaq, kisianni piviusorsiornerugunarpoq pikkorinnerit qulit akornanniinnissaq, Maria Grødem naggasiivoq.
