Maria Grødem USA-mi oqimaatsunik kivittaarivoq: VM-imi peqataanermi misigisaq annertoorujussuuvoq
Misigisaq angisoorujussuuvoq.
Kalaallip, Maria Grødemip crossfitimik nunarsuarmi pissartanngorniunnermi, Crossfit Gamesimi sapaatip akunnerata siuliani peqataanini taama nassuiaatigaa.
Crossfittertartoq ukioqatigiinni unamminermini 12-inngorpoq. Peqataanerali angusaatut annertutigivoq.
- Misigisaq nuannersorujussuuvoq, Maria Grødem oqarpoq.
Taassuma crossfittertartut allat naapinnerat misigisaqarfigingaatsiarpaa.
- Inuit inussiarnerlutillu tikilluaqqusipput, aamma ukiorpassuarni peqataasartut.
Assi: Nammineq assiutigisaq
- Kissasserfimmiinnermi isiginnaarutikkut Youtubekkullu ukiorpassuarni malinnaaffigisimasat takullugit misigisaq annertoorujussuuvoq. Tamarmik tassaniillutik kissasserput, Maria Grødem oqarpoq.
AAMMA ATUARUK Maria Grødem crossfittimi VM-ssaaq
- Taamaammat misigisaq annertoorujorujussuuvoq nuannersorujussuullunilu, peqataaffigisimasanni annertunerpaat ilagaat, Maria Grødem oqarpoq.
CrossFit Games 2021-mi peqataasut katillugit 14.000-iupput.
Tassani oqimaatsunik kivittaaraluni sapinnginneq takutinneqartussaavoq. Pissartanngorniutivinneq ataasinngormat ingerlanneqarpoq.
Akiuussuserneqarnissaminut ilungersortoq
Maria Grødemilli timersornikkut angusai tusagassiuutitigut kingullertigut kisimik sammineqanngillat.
Taannami akiuussutissanik sinneqartoorutimik ulloq naallugu akiuussusersuisoqareernerani sinneruttumik juunimi iluatsitsiniarsarivoq.
Crossfittertartoq Nuummi Ukaliusap eqaarsaartarfiani arlaleriarluni siuleriaattuni utaqqivoq, akunnernilu pingasuni utaqqereerluni akiuussutissamik iluatsitsivoq.
AAMMA ATUARUK GIF: Timersortartunut akiuussutissat sinneruttut tunniunneqarlik
Taamaalioqqusaanngikkaluarporli. Ullormi taanna 61-ileereersimasut kisimik akiuussutissamik kapitittussaagaluarput.
Maria Grødemimi pissartanngorniunnermut maanna naammasseqqammerluinnartumut peqataanissaminik qulakkeeriniarluni akiuussutissamik kapitikkusunneranut pissutaavoq.
