GIF: Timersortartunut akiuussutissat sinneruttut tunniunneqarlik
- Isumaqarpunga periarfissat ujartorneqartariaqartut. Timersortartut taama qaffasitsigisumik unammisartut aamma periarfississagutsigit tapersersussagutsigilluallatukajaaq eqqarsarneq pisariaqarluinnarpoq, Kalaallit Nunaanni Timersoqatigiiffiit Kattuffianni siulittaasoq, Nuka Kleemann oqarpoq.
Pilersaarutit malillugit nunarsuarmi crossfittertartut pikkorinnerpaat, juulip naanerani USA-mi unammilerpata, Kalaallit Nunaat peqataanngaassaaq.
Maria Grødem, 40-nik ukioqartoq, siullermeersumik kalaalertaalluni peqataassaaq.
Angerlarsimaannarnissarli pinngitsoorniarlugu, aappassaanik akiuussuserneqarnissaminik amigaateqarpoq.
AAMMA ATUARUK Timersornermut Naalakkersuisoq timersortartunik akiuussusiinissaq pillugu: Iliuuseqarsinnaanngilanga
Taassuma timersortartunut immikkut aaqqiisoqarsinnaannginnera uggoraa, siusinaarlunimi akiuussuserneqarsinnaanngilaq.
Taannalu Kalaallit Nunaanni Timersoqatigiiffiup siulittaasuaniit isumaqatigineqarpoq.
- Maannakkut ukioq sinnerlugu corona pissutigalugu uninngareerluta, timersortartut avammullu unammiarnissamut ammaakkiartuaarneqarneranni, Timersoqatigiit Kattuffianniit, maanna akiuussuserneqarsinnaanerat periarfissinneqartariaqaraluartut isumaqarpugut, Nuka Kleemann KNR-imut oqarpoq.
AAMMA ATUARUK Crossfittertartoq Maria akiuussutissamik pissarsiniarsarisoq
Arlaatigut illit timersoqartigiiffiup Kattuffianni siulersuisuini siulittaasutut ikiuinissamut iliuuseqarsinnaavit?
- Soorunami ilaasortatsinnit saaffigineqarutta – soorlu VM-imut, EM-imut Pan Amerikansk mesterskabinut imaluunniit OL-imut World Cupimulluunniit unammiartoqassappat, akiuussusiisoqassappat kattuffimmiit aqqutissiuinissatsinnut soorunami piareersimavugut.
Naannerunanilu takinerunngilaq
Timersornermut aatsaat siullerpaamik naalakkersuisoqarpoq, nunatsinnili timersortartunut akiuussutsiinermut tunngatillugu ikiorneqarsinnaanngillat.
KNR-ip timersornermut naalakkersuisoq, Peter Olsen (IA) oqaloqatigaa, taannalu nunarput sinnerlugu timersornermi peqataasut iliuuseqarfigisinnaanagit oqaatigaa.
- Naalakkersuisut siulittaasuata coronalu pillugu allattoqarfiup suliarisimasaat pilersaarusiarisimasaallu ajoraluartumik allanngortissinnaanngilakka. Naatsumik oqaatigalugu, taanna pillugu uanga ajoraluartumik iliuuseqarsinnaanngilanga, Peter Olsen KNR-imut oqarpoq.
Akiuussutissalli sinneruttut timersortartunut tunniunneqarsinnaassagaluarput, Nuka Kleemann isumaqarpoq.
- Isumaqarpunga una politikkikkut apeqqutaasariaqanngitsoq. Oqaluttuap kingulliup takutereerpaa akiuussutissat sinneqarpata timersortartunut taamatut qaffasittumik ingerlataqartunut atorneqarsinnaanersut. Oqaluttuaq naannerunanilu takinerunngilaq, Nuka Kleemann oqarpoq.