Timersornermut Naalakkersuisoq timersortartunik akiuussusiinissaq pillugu: Iliuuseqarsinnaanngilanga
Timersornermut aatsaat siullerpaamik naalakkersuisoqarpoq, nunatsinnili timersortartunut akiuussutissamik kapuinissamut tunngatillugu tassannga ikiuisoqarsinnaanngilaq.
Maria Grødem Nuummeersoq nunatsinnit siullerpaalluni crossfittimik nunarsuarmi pissartanngorniuttoqarnissaanut peqataassaaq.
Pissartanngorniunneq USA-mi ingerlanneqartussaavoq, tunillatsinnissamullu illersorneruniarluni tikinnerminiillu sapaatip akunnerani mattusimaniarnani taanna illoqarfiit pingaarnersaanni sapaatip akunnerata siuliani akiuussutissamik kapuisoqarnerani qasseeriarluni siuleriiaattuni utaqqivoq.
Naalli akiuussutissamik neqeroorfigineqartunut ilaanngikkaluarluni akunnerit pingasut utaqqereerluni siullermeertumik kapitippoq.
AAMMA ATUARUK Crossfittertartoq Maria akiuussutissamik pissarsiniarsarisoq
Maria Grødemip kalaallit timersortartut akiuussutissamik kapineqarnissamut neqeroorfigineqannginnerat uggornarnerarpaa.
- Nunatsinniimmi nunarsuarmi pissartanngorniuttoqarnissaanut ullut tamaasa, qaammatit tamaasa ukiulluunniit tamaasa peqataasoqarneq ajorpoq. Taamaammat immikkut ittumik pisoqartillugu immikkut ittumik aaqqiissuteqartoqarsinnaannginnera uggornartuusoraara. Kisianni ukioqqortunerusut akiuussutissamik kapiteqqaarnissaanut malittarisassaqarnissaa soorunami paasisinnaavara.
Taassuma nunatsinni timersortartunut immikkut ittumik akiuussusersuinissamut pilersaarusiortoqarnissaa kissaatigaa. Taassumami tamakkiisumik kapitinnissaminut aappassaanik kapitinnissani amigaatigaa.
Timersornermut Naalakkersuisoq ikiuussinnaanngitsoq
KNR-ip Timersornermut Naalakkersuisoq, Peter Olsen (IA) oqaloqatigaa, taannalu nunarput sinnerlugu timersornermi peqataasut iliuuseqarfigisinnaanagit oqarpoq.
- Naalakkersuisut siulittaasuata coronalu pillugu allattoqarfiup suliarisimasaat pilersaarusiarisimasaallu ajoraluartumik allanngortissinnaanngilakka. Naatsumik oqaatigalugu taanna pillugu uanga ajoraluartumik iliuuseqarsinnaanngilanga, Peter Olsen KNR-imut oqarpoq.
Taava timersortartut akiuussutissamik kapitinnissaanut atatillugu allannguisoqarsinnaanngila. Kisianni allatigut ikiuisinnaavit?
- Uanga aamma nammineerlunga kissaateqarnikkut atorfilittakka saaffiginikuuvakka peqqullugillu Maria Grødem attavigeqqullugu pingaaruteqarmat aamma soqutiginarpallaaqimmat tusarfigerusullugu paasisaqarfigerusullugulu. Mariap naapinnissaanut qilanaarpunga, Peter Olsen oqarpoq.
AAMMA ATUARUK Maria Grødem crossfittimi VM-ssaaq
Peter Olsenip ammasumik aggersaanermut tunngatillugu Maria Grødemip qanoq unammillernartitaqarneranik anguniakkaminillu angusaqarnissamut qanoq amigaateqarnera paaserusullugu oqaatigaa.
- Ilumoormat aamma pingaaruteqarmat tapersersortariaqaratsigu nunarput sinnerlugu taama angitigisumut peqataanissaa eqqarsaatigalugu. Taamaattumik neriuppunga soorunami allanngortissinnaanngikkaluarlugu, kisianni taamaakkaluartoq taanna amigaatigisimappagu taava misiliigaluarumaarpunga apuuffissanut apuussissallunga, Peter Olsen oqarpoq.
Qanoq ikiuisinnaanissannut assersuuteqarsinnaavit?
- Saaffiginnissut apeqqutaassaaq, taamaattumik pissangavunga aamma Maria Grødem oqaloqatigilerutsigu sunarpiaq uagutsinnut apuutissaneraa. Taamaattumik uani nikuiinnarlunga oqaatigisinnaanngilara qanorpiaq ikiuisinnaanerlunga. Kisianni nalunngilarput aamma Timersoqatigiiffiit kattuffiat aamma team Greenlandeqartoq – taakkulu peqatigalugit iliuuseqarfiginiarsinnaanissaat neriorsuutigisinnaavara, Peter Olsen KNR-imut oqarpoq.
