Maria Grødem crossfittimi VM-ssaaq
Crossfittimi VM-rtoqarnissaanut anngunniuttoqarmat 40-nik ukiulik Maria Grødem Nuummeersoq ilimagisaminit ingerlalluarneruvoq.
Unammeriaatsini assigiinngitsuni periarnerit peqataasut nunagisaminni videomut immiullugit VM-mik aaqqissuisunut Crossfit Openimik taallugu unammisitsisunut nassiunneqarput.
Ukioqqortussutsimi 40-ut sinnerlugit ukiulinni Maria Grødem nunarsuarmi normu 13-tut inissippoq unammeriaatsini assigiinngitsuni pointit katinneqarmata. Ukioqatigiinni pikkorinnerit 20-t kisimik anngussinnaapput anngunniunnissallu sioqqullugit Maria Grødem nunarsuarmi normu 37-tut inissisimavoq. Taamaattumik VM-mut anngussinnaanissaminut qularsimagaluarpoq.
- VM-mut anngussinnaanissara sungiusaasuma neriuutigereerpaa. Normu 37-tut inissisimagama eqqarsaraluarama inissinnernik 18-nik pitsanngoriarsinnaanissara piviusorsiorpallaarunanngitsoq, Maria Grødem KNR-mut oqarpoq.
Isumalluarpoq
2011-mi crossfit aallutilerpaa timersuullu taanna nunarsuarmi siammariartupiloortoq 2015-miit pimoorullugu aallutilerlugu. Maanna Maria Grødem ullormut nalunaaquttap akunnerit sisamat tallimat sungiusartarpoq.
VM USA-mi julip naanerani pisussaammat angalasinnaanermut killilersuutit misissoqqissaarneqarput.
Maria Grødemip sungiusaasua Phil Mansfield Randersimi najukkaminiit VM-qataasussanut arlalinnut sungiusaasuuvoq taamaammat inunnut allanut akuliunnaversaarnissap nalaani sungiusaqatigiissinnaaneq misissorneqarpoq.
VM-mut anngunniunnermi nunarsuarmi kakkannerpaat 13-ttut inissinneq Maria Grødemip VM-mi angusarissaarsinnaanissamut neriuuteqarneranut ilapittuutaavoq.
- Maanna takusinnaalerpara nunarsuarmi kakkannerpaat akornanniissinnaallunga. Taamaattumik sapinngisamik angusarissaarsinnaaneq neriuuteqarfigaara pikkorinnerillu qulit akornanniissinnaassaguma angusaq pitsaasorujussuussaaq, Maria Grødem oqarpoq.