Maria Grødem aamma Inequ Holm ujaminnattaatik atorlugit pinnattaaminik nittarsaapput.Assi: Maria Grødem

Maria Grødem Tyskland-mi crossfittertuni ajugaavoq

Crossfittimi Tysklandimi unammersuarnermi German throwdownimi sapaatip akunnerata naanerani kalaallit arnat marluk ujaminnaqataapput.

Crossfittimik unammisartup Maria Grødemip Inequ Holmn Tysklandimi crossfittimi unammersuariaqatigivaa. Arnat taakku unamminerni peqataaffigisaminni maluginiarneqarluarput ilungersornertillu ujaminnassutigalugu.

- Ullut marluk ingerlaneranni unamminerit arfiniliupput taakkunanilu marlunni ajugaareerlunga sinnerini tullersortaavunga. Tamatuma kingunerisaanik angusat katinneranni ajugaavunga, Maria Grødem KNR-mut oqarpoq.

AAMMA ATUARUK Maria Grødem USA-mi oqimaatsunik kivittaarivoq: VM-imi peqataanermi misigisaq annertoorujussuuvoq

Unammersuarneq German throwdown anngunniuteqqaarluni peqataaffigineqarsinnaavoq. Maria Grødem ukioqqortussutsimi + 40-mi peqataavoq tassanilu crossfittimi VM-qataareersut arlallit peqataapput.

- Nalunngereerpata pingajuattut inissillunga annguttuullunga Taamaattumik ujaminnattut akornanniinnissara neriuutigisimavara, Maria Grødem oqaluttuarpoq.

Qamani ikumasoqarpoq

Crossfittertartup Inequ Holmip Maria Grødem aasaq VM-riarmat angalaqatigivaa taamaasilluni crossfittimi nunarsuarmi kakkannerpaat qanimut malittaralugit. Inequ Holm aamma German throwdownimut annguttunut ilaavoq.

- Unammisuni peqataaffigisanni qulit peqataaffigisaanni pingajuattut inissippunga. Assorsuaq tupaalappunga nuannaartorujussuullungalu, Inequ Holm KNR-mut oqaluttuarpoq.

Tysklandimi peqataareerluni suli sungiusarnerunissamut piumassuseqarluarnerarpoq.

- Soorlumi eqiiallalluni qamani ikumasoqartoqartoq oqartumik: Qaa ingerlaqqiinnarit, Inequ Holm oqarpoq.

- Isumaqarpunga aamma unammiartortarneq pingaaruteqartorujussuussoq. Taamaasilluni nalunaaquttap akunnerpassuinik atuineq isumaqarnerulersarpoq pissarsissutaallunilu, Inequ Holm maanna Danmarkimi ilinniartuusoq oqarpoq.

Maria Grødem Nuummut angerlarpoq januarimilu USA-mi Miami-mi nunanit tamalaanit peqataaffigineqartumi unamminissaminut piareersarluni.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl