Qulaarpaa Nalunaaquttap akunnikkaartumik: Naalakkersuisut isasoormata

01.oktober politikkikkut uivernersuit ilaat pivoq. Aleqa Hammondip Namminersorlutik Oqartussat aningaasaataannik atornerluisimanerata kingunerisaanik politikkikkut pissutsit ilungersunarsisippai, Naalakkersuisut avissaartuupput Inatsisartunullu qinersisitsinissamik suaaruteqartoqarluni. Ullup ingerlanerani pisut uani atuarsinnaavatit:

09:15: Jens-Erik Kirkegaard (S), Nick Nielsen (S) aamma Steen Lynge (A) Naalakkersuisunut ilaasortatut tunuarlutik tusagassiorfinnut nalunaaruteqarput. Tusagassiortunik piaartumik nal. 10.00 katersortitsinissamut qaaqqusipput.

 

09:58: Atassut tusagassiorfinnut naatsumik nalunaaruteqarpoq, tassanilu allassimavoq  partii naalakkersuisooqatigiinnit tunuartoq.

 

10:00: Aleqa Hammondip Namminersorlutik Oqartussat aningaasaataannik atornerluisimanera namminneq naleqartitaminnut naapertuutinngitsoq Jens-Erik Kirkegaard (S), Nick Nielsen (S) aamma Steen Lynge (A) oqarput. Siverth K. Heilmann tusagassiortunut katersortitsinermi peqataavoq. Naalakkersuisut ikinnerussuteqalerput.

 

11:00: Partiit allaffeqarfiini tusagassiortunut katersortitsinerup kingornatigut ulappunnersuaqarpoq. Siumut amerlanerussuteqaqqilerniarluni misiliigaluarpoq, illuatungiliuttullu suliaminnik ataqatigiissaaripput. Inuit Ataqatigiit siulittaasuat Sara Olsvig Naalakkersuisut Siulittaasuattut inissinnissamik Siumumit neqeroorfigitippoq.

 

12:20: Inatsisartut ullormut ataatsimiinnissaraluat kinguartinneqartoq aatsaallu oktoberip 07-iani ataatsimiittoqaqqissasoq Inatsisartut siulittaasuata Lars-Emil Johansenip nalunaarutigaa.

KNR-TV-p oqalliffik Qulaarpaa kalaallisut qallunaatullu sisamanngorpat unnukkut kalaallisut qallunaatullu aallakaatissavai. Politikkikkut pissutsit ilungersunarsinerannut suna peqqutaanersoq qinikkat aperissavavut. Qulaarpaa kalaallisut nal. 19.30 aamma qallunaatut nal. 20.30 aallakaatissapput.

 

13:00: Inuit Ataqatigiit Siumukkunnik naalakkersuisooqateqarumannginnerat imaluunnit ikinnerussuteqartunik naalakkersuisunngortitseqataajumannginnerat Sara Olsvigip nalunaarutigaa.

 

14:28: Paasissutissat imminnut assortuuttut ullup ingerlanerani tusarliunneqaqattaareersullu Atassut qinersisoqarnissaanik piumasaqarpoq, Siumup periarfissaasinnaasut tamaasa iluatsinngitsoorlugit immikkut ittumik ataatsimiilerpoq.

 

16:13: Siumup siulittaasoqarfia nalunaarpoq Aleqa Hammond partiip siulittaasuatut tunuartoq. Jørgen Wæver Johansen partiip siulittaasorigallagaatut inissippoq.

 

16:39: Siumut tusagassiortunut tuaviortumik katersortitsinissamik nal. 16:45 qaaqqusivoq.

 

16:45: Naalakkersuisunut siulittaasuugallartoq Kim Kielsen 28.november qinersisoqarnissaanik suaarutiginnissalluni nalunaaruteqarpoq.

 

17:15: Pissanganartorsiortoqaqqilerpoq. Inatsisartut piaartumik ataatsimiigiaqquneqarnissaat illuatungiliuttut piumasaraat. Lars-Emil Johansenip aqaguani immikkut ittumik ataatsimiisitsinissaq kissaatigaa.

 

18:00: Aleqa Hammondip pisuussuteqannginnini apersorneqarnermini oqaluttuaraa, sussuteqarsimanngitsutullu nalunaarutigineqarnissani naatsorsuutiginerarlugu.

 

18:02: Inatsisartut ulloq taanna nal. 21:00 immikkut ittumik ataatsimiisinneqassasut Lars-Emil Johansenip nalunaarutigaa.

 

21:00: Inatsisartut immikkut ittumik ataatsimiinnerat aallartippoq. Aningaasanut inatsisigigallagassaq akuerineqarpoq, piffissaliussap iluani suli akuerineqarnikuunngimmat.

 

21:06: Inatsisartunut ilaasortat tamarmik ataatsimiinnerminni akuersissutigalugulu isumaqatigiissutigaat Inatsisartunut 28.november qinersisoqassasoq.

 

Isummersuutit


 

Pages