Utoqqaat nappaatillillu covid-19-imut nualluummullu akiuussuserneqarnissaminnut neqeroorfigineqartut

Issinneruleriartorpoq tamannalu napparsimalersut amerlanerulernerinik kinguneqarsinnaasarpoq.

Ukiakkut ukiukkullu covid-19-imik nualluummillu tunillatsittut amerlinissaat Nunatsinni Nakorsaaneqarfiup naatsorsuutigaa. Peqqinnissaqarfik nittartakkaminni tusagassiuutinut nalunaarummi allappoq.

Taamaattumik inuit 65-ileereersimasut inuillu katsorsarneqarsinnaanngitsumik nappaatillit, pingaartumik napparsimarulunnissamut navianartorsiortut, covid-19-imut akiuussutissamik kapitinnissaat Nunatsinni Nakorsaaneqarfiup innersuussissutigaa.

Inuit nualluummik covid-19-imillu tunillatsissimasut amerlanerit annikitsuinnarnik ersiuteqartarput. Inuilli ilai nualluut perulunnartumik napparsimassutigilersinnaasarpaat ajornerpaamillu pisoqartillugu nappaat inuunerannut navianartorsiortitsilersinnaasarluni.

Puakkut nappaateqartut, sukkornermik kræftimillu nappaatillit tassaapput peruluuteqalersinnaasut ilaat, taamaattumillu taakku akiuussutissamik kapineqarnissaannik neqeroorfigineqarput. Akiuussutissamik kapitinnissamut neqeroorfigineqartut peqqinnissaqarfiup nittartagaanni takuneqarsinaapput.

Innuttaasut akiuussutissalertinnissamut aggeqqusissummik peqqinnissaqarfimmiit tunineqarnavianngillat. Najukkami kapitinnissaq neqeroorutigineqaraangat, innuttaasut neqeroorfigineqartut namminneq takkutissapput. Piffissamik inniminniisoqaqqaartariaqanngilaq.

Akiuussuserneqarsinnaaneq nalornissutigigaanni, napparsimmavimmut saaffiginninnikkut ilitsersortittoqarsinnaavoq.