Naalakkersuisunngortitsinissamik neqeroorutinut marlunnut IA qujaannartoq

Inuit Ataqatigiit naalakkersuisunngortitseqatigiumallugit Siumut neqerooruteqarsimagaluarpoq, allaallumi ikinnerussuteqarlunilu naalakkersuisooqatigiinnik pilersitsinermi pissaaneq tamaat tunniukkumallugu neqeroorutigisimagaluarlugu. Neqeroorutilli taakku marluk itigartinneqarput.
oktobarip 01-at 2014 13:45


Siulittaasulli IA-llu gruppiata innuttaasut piginnaatitsissuteqarnissaat kissaatigaat. IA qinerseqqusivoq.


- Naalakkersuisunut siulittaasuugallartumit Kim Kielsenimit neqeroorfigineqarput - neqeroorutaa siulleq tassaavoq naalakkersuisooqatigiinnissamik isumaqatigiissuteqarnissaq. Tamatumunngalu ersarilluinnartumik naaggaarpugut - siullertut, partii kimit siulittaasuuffigineqarnersoq aammalu kina naalakkersuisunut siulittaasuunersoq nalullugu naalakkersuisooqatigiinnissamik isumaqatigiissuteqarnissamik isumaqatigiinniaqatigisaqarsinnaanngilagut. Taamaammat erseqqissumik tamatumunnga qujaannarpugut.

 

- Aappaattullu, partii pisumi matumani taama tatiginanngitsigisumik iliortoq naalakkersuisooqatigiinnissamik isumaqatigiissuteqarfigisinnaannginnatsigu. Taamaammat qinersisoqartariaqarnera Kim Kielsenimut Siumumullu ersarilluinnartumik oqaatigaarput. Innuttaasut apereqqinneqartariaqarput, nunatsinni avissaartuunneq annertusiartuinnartoq isiginngitsuusaaginnarsinnaanngilarput, Sara Olsvig KNR-imut oqarpoq.

 

- Ikinnerussuteqarluni naalakkersuisooqataalernissamut tunngatillugu - tamanna soorunami partiimi oqaluuseraarput, ullaarlil akissutigisarput ersarereerpoq: Naagga, taamaaliorusunngilagut. Naalakkersuisooqataassagutta, minnerunngitsumillu partiitut tamatumunnga siuttuussagutta, taava innuttaasunik tamatumunnga piginnaatitsissummik tunineqarnissarput kissaatigaarput, siulittaasoq taama oqarpoq.

 

Innuttaasut tatiginnikkunnaarput

Aleqa Hammondip kukkusimanerata kingorna qinersisoqassappat IA inissisimalluassaaq. Tamannali pillugu Sara Olsvigip parteeqataasalu maanna qinersisoqarnissaa piumasarinngilaat.

- Nutaamik qinersisoqartariaqarpoq, innuttaasut nutaamik aperineqartariaqarput, Inatsisartut Naalakkersuinikkullu ingerlatsineq tatigineqarsinnaasariaqarpoq, tamannalu pilerseqqissagutsigu innuttaasut nutaamik aperineqartariaqarput.

- Taamaammallu uagut naalakkersuisooqataaleriataaginnarsinnaanngilagut, Sara Olsvig oqarpoq.

Qinersinissaq marlunngorpat Inatsisartut ataatsimiinnerat aallarteqqippat, suaarutigineqassappat, Inatsisartut Siulittaasuat Lars-Emil Johansen naapertorlugu sapaatip akunneri arfinillit suaarutiginninnermit ingerlareerpata pissaaq, tassalu novembarip 18-iani.