Politiit ullormut nalunaarutaat: Tillinniarnerit marluk angullu politiimut nakuusersimasutut pasillerneqartoq
Sisimiuni Pisiffik unnuaq tillinniarfigineqarsimavoq. Politiit nalunaaqutaq 01.30 missaani kalerrinneqarput, tillinnialli tillitaqarsimanersut ullaaq suli ilisimaneqanngilaq.
- Suliaq misissorparput, tillittoqarsimanersorlu suli oqaatigiuminaappoq taamaappallu aamma suut tillinneqarsimanersut, pigaartut pisortaat Heini Jacobsen oqarpoq.
Tillinniarnerit aappaat Nuummi nalunaaqutaq marlunut pivoq, tassani tillinniat Nuup qeqqani savat meqquinik umimmaallu qiviuinik nuersagassianik pisiniarfimmut atisaarniarfiusumullu Qiviumut isertersimapput.
- Nalilinnik tilligartoqarsimavoq, pigaartut pisortaa oqarpoq, allamilli oqaatigisaqarsinnaanngilaq.
Pisiniarfik sisamanngornerup unnuaani aamma tillinniarfigitissimasoq, tillinniallu pisiassanik arlalinnik tillissimasut, pigartut pisortaata ippassaq oqaatigaa.
Niaqummikkaa
Naggataatigut pigaartut pisortaata eqqaavaa Maniitsumi angut atorfilimmut nakuusersimasutut unnerluutigineqartoq.
Sisamanngornerup unnuaani politiit suliassaminnik suliaqarneranni angutip politeeq niaqummissimavaa.
- Angut atorfilimmut nakuusersimasutut maanna unnerluutigineqarpoq, tamanna taamaallaat oqaatigisinnaavara, Heini Jacobsen oqarpoq.
