Issittoq pillugu isumaqatigiissut nutaaq piareertoq

Kalaallit Nunaanni sakkutooqarnikkut sakkussiorneq suli ingerlavoq. Issittumi Illersornissaq pillugu isumaqatigiissuutip aappata utaqqiuarneqartup ullumi saqqummiunneqarnerani erseqqinnerpaavoq. 

Timmisartut nakkutilliissutit nutaaniit droninut issittumilu umiarsuit allat marluk pissarsiarineqarnissaat isumaqatigiissummi siunnersuutaavoq. 

Vivian Motzfeldt isumaqatigiissummik saqqummiussinermini oqarpoq:

- Issittoq pillugu aamma Atlantikup avannarpasissuani isumaqatigiissutip aappaa isumaqatigiissummut ukiup aallartilaarnerani isumaqatigiissutigisarpullu ataqatigiipput.

Tassunga danskit illersornissamut ministeriat Troels Lund Poulsenip isumaqatigiissut oqaluttuarisaanermi isumaqatigiissut immikkuullarissuunerarlugu ilassuteqarpoq.

- Isumaqatigiissut kunngeqarfik tamakkerlugu nunakkut, immakkut silaannakkullu illersorpaa, tamanna isumannaallisaanikkut pissutsinut piffissap ingerlanerani ineriartuinnartumut pingaaruteqarpoq, taanna oqarpoq. 

Ruslandip Issittoq salliukkaa taamaammallu naalagaaffeqatigiinnermut aamma salliunneqartoq, ministerip tusagassiortunik katersuutsitsinermi oqaatigaa.

- Kunngeqarfimmi tamarmi nukittuumik ataqatigiinnerput isumaqatigiissutip erseqqissarpaa, Troels Lund Poulsen oqarpoq.

Illersornissamut peqqumaasersornerunerup saniatigut Issittumi Sakkutooqarfimmi nutaamik immikkoortortaqalernissamut aningaasanik immikkoortitsisoqassaaq, kiisalu immaq naqqatigut kabeli nutaaq Kalaallit Nunaanni attaveqaasersuutinut nukittorsaataasussaq. Aamma Nuummi Kangerlussuarmilu umiarsualivinnik alliliineq. 

Isumaqatigiissummi issittumi umiarsuit marluk aamma ilanngunneqarput, taamaalilluni illersornissaqarfik katillugit tallimanik umiarsuaqalertussanngorlugu, ministerit taakku marluullutik oqarput.

Immap naqqatigut kabelit pillugit isumannaallisaaneq

Nuna ajortumeerniarneqarnissaanut aarlerinartorsiortoq, Toke Binzer Tusassimi pisortaq siornatigut tusagassiorfimmut Sermitsiamut oqarnikuuvoq.

Tamatumani internetip attaveqaatillu immap naqqatigut kabelit marluk aqqutigalugit nassiussorneqartarnerinik pissuteqarpoq, isertortumik saassussinermi kipineqarnissaannut aarlerinaateqartut.

Immap naqqatigut kabeliliornissamut attaveqaasersuutinut nukittorsaasussanut, Danmarki 3 milliardit koruuninik immikkoortitsissasoq isumaqatigiissummi nutaami allaqqavoq. Immap naqqatigut kabeli Kalaallit Nunaata Danmarkillu akornatiguussaaq.

- Illersornissamut isumaqatigiissumi attaveqaasersuutit pingaaruteqarluinnartut ilanngunneqarnissaat uagutsinnut pingaarutilerujussuuvoq. Taamaammat assorujussuaq nuannaarutigaarput attaveqaatitigut innarleruminassutsitta suli massakkut ullumimut patajaannerulluni inissinnissaanut isumaqatigiissut taanna aamma ilanngunneqarmat,  Vivian Motzfeldt oqarpoq. 

Issittumi isumaqatigiissutip aappaa, Danmarki illersornissamut immikkoortortami akisussaasuummat Danmarkip akiligassaanik, katillugit 27 milliardit koruuninik missingersuuteqarpoq.