Kulusummi aalisartut piniartullu: Juullilersorli ikioqqulerpugut, sulili qisuariarfigineqarnata
Kulusummi Mittarfeqarfiit uuliaasiviat ulikkaartoorami 120.000 literimik nunamut, tatsinut immamullu siaruaattumik decembarip aappaani uuliakoorpoq.
Solaari immamut siaruaattoq oqartussanit 80.000 literiussangatinneqarpoq, sikueqqaartinngagulu uuliaajaaqqikkallarsinnaanatik Mittarfeqarfiit nalunaarput. Tamanna Mittarfeqarfiit uuliakoornernik saliilertoqquneqarnerannik kinguneqarpoq.
Kulusummi piniartut ilaat uuliagasattumik qassutinut napissimasumik uuliakoortoqareersorlu puisippoq.
Piniartup taassuma puisittani uuliagasammat amia neqaaluunniit tunisinnaasimanngilai. Taamanikkullu juullilersorsuummat, Kulusummi piniartut Naalakkersuisunut ikioqqupput.
AAMMA ATUARUK Kulusummi puisi uuliagasattoq pisarineqareersorlu - piniartut ikioqqusut
Januaari naajartorpoq. Naalakkersuisuniilli suli akissutisinatik, Kulusummi aalisartut piniartullu peqatigiffiiata siulittaasua Knud Kilime KNR-imut oqarpoq.
- Suliaq sumut killinnersoq naluara. Ikioqqulluta qinnuteqarnitsinniilli ulloq manna tikillugu suli akineqarnatalu attavigineqanngilagut, Knud Kilime oqarpoq nangillunilu.
- Piniartutut inuussutissarsiuteqartuulluni assut ajuusaarnarpoq, pisoq taama annertutigisoq suli qisuariarfigineqannginnatta.
Qinnuteqaataat Namminersorlutik Oqartussani nuutsitaaqattaartoq
Kulusummi aalisartut piniartullu ikiorserneqarnissamik qinnuteqaataat Namminersorlutik Oqartussani naalakkersuisoqarfinnut assigiinngitsunut nuutsitaaqattaarpoq. Qinnuteqaataat aalisarnermut piniarnermullu naalakkersuisumut, Karl Tobiassenimut (S), siullermik anngunneqareersorlu ataatsimiissutigineqarpoq, Karl Tobiassenilli suliaq taanna isumaginninnermut, suliffeqarnermut nunamullu namminermut naalakkersuisumut, Jess Svanemut (S), tamatuma kingorna ingerlateqqippaa.
Suliarli taanna naalakkersuisut siulittaasuannut, Múte B. Egedemut (IA), ingerlateqqinneqaqqissimammat, taassuma suliaq maanna tigummivaa.
AAMMA ATUARUK Kulusummi puisi uuliagasattoq pisarineqareersorlu - piniartut ikioqqusut
Kulusummili piniartut aalisartullu tassa suli akissutisinngillat.
- Pisariaqatilluinnaraluarparput Kommuneqarfik Sermersuumi upalungaarsimanermut pisortamit aamma aalisarnermut piniarnermullu naalakkersuisumit tikinneqarnissarput. Uagulli taama annertutigisumik ajutoortoqarnerani sooq tikinneqannginnerput paasisinnaanngilara, tupigusuutigaara, Knud Kilime oqarpoq.
Suliaq sumut killinnersoq paasiniarlugu, naalakkersuisut siulittaasuat attavigaarput.
Suliaq pillugu
Mittarfeqarfimmi Kulusummi dieseloliep tankimut nuunneqarnerani 120.000 literi sumut tamaannga kuuppoq.
40.000 literi tatsiniit milluarlugu uterteqqinneqarpoq. Sinneruttorlu 80.000 literi upalungaarsimasut imaanut kuussimassangatippaat, siaruaassimassallunilu.
Kulusummi aalisakkanik tunitsiveqanngilaq, taamaammat puisip amia neqaalu inuussutigineqarpoq.
- Uuliakoortoqarnerata kingunerisaanik puisit Kulusuup eqqaaniittut tammararput, Kulusummi piniartut aalisartullu peqatigiiffiani siulittaasoq oqarpoq.
Taamaammat Kulusummi aalisartut piniartullu aningaasatigut ikiorserneqarnissaminnik naalakkersuisunut qinnuteqarput.
Qanorli iliornissamik suli siunniussaqaratik, taanna KNR-imut allappoq.
- Suliamik maanna ataqatigiissarisoqaleruttorpoq. Saaffiginnissutit assigiinngitsut Naalakkersuisoqarfinnut arlalinnut saaffiginnissutaasarsimasut aallaavigalugit suliaq nalilersorneqassaaq.
- Ilanngullugu ilisimatitsissutigissavarput, qaammatip uuma naalernerani aalisarnermut piniarnermullu naalakkersuisoq Naalakkersuisut sinnerlugit nunatta kangianut angalassammat, tassanilu qanimut oqaloqatigiinnerit inuttaasunillu naapitsinerit aamma ingerlanneqassammata, Múte Bourup Egede allappoq.
Aningaasanik qasserpianik taarsiiffigineqarusunnerlutik
oqaatigerusunngikkaat
Kulusummiliuna aalisartut piniartullu aningaasanik qasserpianik taarsiiffigineqarusuttut?
Taakku tamanna oqaatigerusunngilaat.
AAMMA ATUARUK Kulusummi mittarfimmi pisortaq: Siku aatsinnagu soriaqqissinnaanngikkallarpugut
Solaarimimmi uuliakoorujussuartoqarmat upernaaru kiatsileriarpat ajornartorsiornerulissallutik, piniartut ilimagaat.
- Kulusuup eqqaa aalisagaqarfissuuvoq, taamaammat aalisartut Kulusummiuinnaanngitsut Kuummiini tunitsivimmut tunisassaminnik tamaani aalisartarput. Taakku aamma arlaatigut eqqugaanissaat ernumanaqaaq.
- Tunumiuusugullu mamarilluartakkagut uillut immallu naasui assigiinngitsut uuliakoorfiup qanittuani katersorneqartartut aamma nerineqarsinnaajunnaarsimassapput.
Taamaammat taanna siunnersuuteqarpoq.
- Kulusummi uuliakoorneq qanittumi nungukkallarnavianngilaq. Kiatsippat tipi aatsaat iluamik sakkortusinissaa naatsorsuutigisinnaalluinnarparput. Taamaammat uuliakoornerup nungulluinnarnissaata tungaanut taarsiffigineqartarnissarput kissaatigaarput, taanna KNR-imut oqarpoq.
