Kulusummi mittarfimmi pisortaq: Siku aatsinnagu soriaqqissinnaanngikkallarpugut
Mittarfeqarfiit Kulusummi imaarsaat atorlugu nuussinermi qaminnissaa puigormassuk dieselolie 120.000 literisut annertutigisoq tatsinut, nunamut imaanullu decembarip aappaani kuuppoq.
Mittarfimmi pisortap, Bendt Duusip dieselolie sumut tamaannga kuuttoq aqaguani siumormagu pisoq aatsaat unitsinneqarpoq.
- Qanoq annertutigisoq imaanut kuussimanersoq naluarput. Aamma qanoq annertutigisoq aputip sikullu ataaniissimasinnaanersoq, ajoraluartumik naluarput, taanna oqarpoq.
Taamaammat nunalerinermut, imminut pilersornermut, nukissiuutinut avatangiisinullu naalakkersuisoqarfimmiit suliakkiissutinik arlalinnik Mittarfeqarfiit Kulusummut nassiussipput.
Nunalerinermut, imminut pilersornermut, nukissiuutinut avatangiisinullu naalakkersuisoqarfimmiit Mittarfeqarfiit Kulusummut piumasaqaatit:
Mingutitsiffiup eqqaani timmissanik toqungasunik nassaartoqassagaluarpat nalunaarsorneqassapput, timmissallu eqqaaniittut sivikinneqarpaamik sap. ak. marlunni qinillitsaaliorneqassapput.
Uuliakoorneq nunami imaanilu annikinnerpaaffissamiitinniarlugu Mittarfeqarfik suliniuteqassaaqq, uuliakoornerullu mingutitsinerata annertussusaanik misissuissallutik.
Imaani saliinermi uulia imaaniittoq assersorlugu siaruatsaaliorneqassaaq.
Imaanut kuuffiup nalaa uuliamik siarutsaaliuisussamik assersorneqassaaq. Taamaaliornikkut imaanut kuuttoq allamut siaruaatinnginniassammat.
Aput sikulu dieselolieqarsinnaasut katersorneqassaaq.
Nuna imarlu dieseloliemi mingutsitsiffiusoq ullormut nakkutigineqartassaaq.
Dieseloliemik naammattuuigaanni piaartumik milluarlugu piiarneqartassaaq.
Dieselolie katersorneqarsimasoq isumannaatsumut inissisimaneqassaaq, qerilluni qaannginnissaa anguniarlugu.
Nunami mingutsitsinermut tunngatillugu Mittarfeqarfiit suleriutsimik pilersaarusiussaaq.
Suliakkiissutit ilaatigut makkuupput, uuliaq qanoq annertutigisoq imaanut mingutsitsilluni kuussimanersoq misissornissaa, sikumut apummullu kuussimasinnaasut piiarneqarnissaat, Uuliakoorneq nunani imaanilu annikinnerpaaffissamiitinniarlugu Mittarfeqarfik suliniuteqarniarpoq, uuliakoornerullu mingutitsinerata annertussusaanik misissuillutik.
- Iliuuserisinnaasagut iliuuseqarfigereerpagut, milluarlugit katersorsinnaasagut katersoreerpagut. Dieselolie katersugarput suli uninngatipparput, taanna umiarsuaqarpat aatsaat tunniukkumaarparput.
Ajutoornerup nalaani nuna qerereersimavoq sikoreersimallunilu.
Taamaariarmallu uuliakoornerup katersorniarnera ilungersunartoq, pisortaq oqarpoq.
AAMMA ATUARUK Upalungaarsimanermut pisortaq uuliakoorneq pillugu: Pinngortitamut uumasunullu ulorianarnersoq nalilersorneqassaaq
Kommuneqarfik Sermersuumi upalungaarsimanermut pisortap oqarnera naapertorlugu, 40.000 literi tatsimiit milluarlugu katersorneqarpoq.
Kuussimasullu sinnera 80.000 literi siku aatsinnagu sumut kuussimanersoq paasineqarsinnaanngilaq.
Sikulli aatsinnagu Mittarfeqarfiit allatut iliuuseqarsinnaanngikkallartoq, Bendt Duus oqarpoq.
- Kangerlummi sikusimanera peqqutigalugu uulia immamiittoq ajoraluartumik assersorsinnaanngilarput, assiaqut sikup qaavanut ilisinnaanngilarput, dieseloliemi sikup ataaniippoq.
- Dieselolie nunap ataanut kuussimappat saliineq aallartissavaput. Tamannali aput aappat aatsaat aamma pisinnaavoq, maannami nuna qerillunilu aputeqarpoq, Bendt Duus oqarpoq.
Dieselolie litererpassuit immamiittoq
Dieselolie literi tusindilikkaaq qularnanngivissumik imaaniippoq.
Kulusummi piniartup puuisi uuliarasattoq qaammatip aallartinnerani qassutiminik napillugu pisaraa. Neqaa nerineqarsinnaanngitsoq, amialu tunineqarsinnaanngitsoq.
Kulusummi aalisakkanik tunitsiveqanngilaq taamaallaat puisip amianik tunisinikkut piniartut akissarsiorsinnaapput. Puisip neqaa aamma innuttaasunut tuniniarneqartarpoq, inuussutigineqarluartarlunilu.
Taamaammat Kulusummi piniartut ikiorsiissutinik Naalakkersuisunut qinnuteqarput.
Taakku qanoq ikiorserneqarsinnaanerat maanna Naalakkersuisunit misissuiffigineqaleruttorpoq.
-Piniartut noqqaanerat paasilluarsinnaavara. Aamma naalakkersuisut susassaqarfimmi iluani iliuuserisinnaasatik oqariartuutigisimavai, maannamullu naalakkersuisuninngaanniit periarfissanik arlalinnik ujartuivugut, Naalakkersuisut siulittaasuat Múte B. Egede Qanoruumut pingasunngormat oqarpoq.
AAMMA ATUARUK Uuliakuungaatsiartoqartoq: 120.000 literi tankimit aniasoq
Mittarfeqarfimmullu suliakkiissutigineqartut akisussaassusilimmik suliarissagitsik, mittarfimmi pisortaq oqarpoq.
- Qanoq iliuuseqarsinnaanerput misissuiffigalugu aallartereerpugut. Apummi aappat suliassarput annertuneroriaannaavoq. Siku aappat uuliamut assiaqut ikkutissavarput, dieselolielllu sinnera milluarlugu katersorsinnaappat katersussavarput.
- Sapaatit akunneranut marloriarluta imaaniit misissugassamik tigusisarpugut. Uulikoorneq kangerliumanermiittoq qanoq annertutiginersoq marlunngornerit tallimanngornerillu tamaasa misissuiffigisarpaput, Bendt Duus oqarpoq.
Suleriuseq allanngortinneqartoq
Mittarfeqarfimmi uuliakoornermik nalaattaqaqqikkumanatik maanna iliuuseqarput.
Tankimiit tankimut nuussisoqartillugu suleriuserineqartoq allanngortinneqartoq, Bendt Duus ilisimatitsivoq. Tassa nuussisoqartillugu inuit marluk suleqatigiilluinnarlutik nuussinermik suliaqartalissapput.
- Nuussiniartoqartillugu ventili ikinneqaraangat akunnerup ataatsip qaangiunnerani nammineerluni qamittalissaaq. Taamaalilluta tanki ulikkaarluni utsersulinnginnissaa qulakkiissavarput.
