Kulusummi puisi uuliagasattoq pisarineqareersorlu - piniartut ikioqqusut
Kulusuup mittarfeqarfiani dieselolie 120.000 literi sumut tamaannga kuussimasoq Mittarfeqarfimmi sulisut decembarip tallimaanni iterput.
120.000 literip kuunnerani 40.000 literi tatsimut kuussimasoq milluarlugu katersorneqaqqippoq, sinneralu 80.000 literi upalungaarsimanermi pisortap tulliata imaanut kuussimasoq ilimagaa, taannalu milluarneqarsinnaasimanngilaq.
Uuliakoornermi maanna Kulusummi piniartut eqqugaallutik tusagassiuutinut nalunaarummik allapput.
- Kulusummi dieselimik annertuumik kuuttoqarnerani piniartut annertuumik eqqugaapput. Piniartup qassutimini pisarisimasaa dieseloliemik sussaanngilaq. Neqaa tipingaarmat nerineqarsinnaanngilaq, amialu uuliaqangaarmat tunineqarsinnaanani, peqatigiiffik allappoq
AAMMA ATUARUK Upalungaarsimanermut pisortaq uuliakoorneq pillugu: Pinngortitamut uumasunullu ulorianarnersoq nalilersorneqassaaq
Dieselolie imaanut kuuttoq katersorneqarsinnaanngitsoq suneqarsinnaanngitsorlu, Kommuneqarfik Sermersuumi upalungaarsimanermut pisortap tullia, Henrik Andreassen KNR-imut oqarpoq.
- Dieselolie imaanut kuuttoq nammineerluni aalannguulluni nungukkumaarpoq. Uagut qanoriliorsinnaanngilagut. Ukiuummalli qanoq sukkatigisumik aalanngorluni nungussanersoq eqqoriaruminaappoq, soorunami sila nillermat arriinnerusumik aalannguukkiartussaaq, Henrik Andreassen oqarpoq.
Taassuma oqarnera naapertorlugu, maanna nunalerinermut, imminut pilersornermut, nukissiuutinut avatangiisinullu Naalakkersuisoqarfiup dieseloliemik siaruaattoorneq pinngortitamut uumasunullu uloriarnartorsiortitsinersoq nalilersorneqassaaq.
Ikiorsiissutinik qinnuteqartut
Kulusummi aalisakkanut tunitsiveqanngilaq taamaallaat puisip amianik tunisinikkut piniartut akissarsiorsinnaapput. Puisip neqaa aamma innuttaasunut tuniniarneqartarpoq, inuussutigineqarluartarlunilu.
Taamaammat Kulusummi piniartut aalisartullu peqatigiiffiat ikiorsiissutinik qinnuteqarpoq.
- Uuliakoortoqarnerata kingunerisaanik puisit Kulusuup eqqaaniittut tammararput, amia tunisarparput, aamma neqaa tuniniartarparput, maanna juullip qaammataani akissarsiutissaaruteriataarpugut, Kulusummi piniartut aalisartullu peqatigiiffiani siulittaasoq, Knud Kilime oqarpoq.
Taamaammat Kulusummi piniartut aalisartullu peqatigiiffianni siulittaasoq, ikiorserneqarnissaminnik qinnuteqarlutik KNAPK-mut tunniussipput.
- Juulli eqqarsaatiginerullugu piniartutut inuussutissarsiuteqartuusugut puisaaruteriataarnitsinni tuniniagassaaruppugut, taammaammat aningaasatigut ikiorserneqarnissatsinnik qinnuteqarluta nassiussivugut, maanna qanoq akineqarnissarput maanngaanniit naalarnissavarput, Knud Kilime oqarpoq.
KNAPK-llu maanna Kulusummi piniartut ikiorserneqarnissaannik qinnuteqaataat Aalisarnermu piniarnermullu naalakkersuisoqarfimmut ingerlateqqikkitsik, Mikael Petersen KNR-imut oqarpoq.
- Ajunaarnersuaqartillugu ikiorsiissutinik qinnuteqarfissaqarpoq. Kulusummili piniartut inuussutituaminnik maanna eqqugaarujussuarput, taakkuli qinnuteqaataat paasilluarlugu naalakkersuisoqarfimmut ingerlateqqipparput, Mikael Petersen oqarpoq.